విశాఖలో మూడు రోజుల పాటు 'సేనతో జనసేనాని' పేరుతో సమావేశాలు నిర్వహిస్తోంది. ఈ కార్యక్రమంలో భాగంగా ఆంధ్రప్రదేశ్ ఉప ముఖ్యమంత్రి, జనసేన అధినేత ఇంట్రెస్టింగ్ కామెంట్స్ చేశారు. 2019 ఎన్నికల్లో జనసేన పార్టీ ఘోరంగా ఓడిపోయినందుకు.. తాను ఆనందంగా ఫీల్ అయినట్లు చెప్పుకొచ్చారు. ఆ ఓటమి ద్వారానే కష్టాలు ఎలా ఉంటాయో.. ఆ భగవంతుడు తనకు చూపించినట్లు పేర్కొన్నారు. తాను రాజకీయాల్లోకి రావడానికి 21 ఏళ్లకే బీజం పడినట్లు పవన్ కళ్యాణ్ వెల్లడించారు. ఇక తాను సినిమాలు చేయడం వల్లే.. ప్రస్తుతం ఇంతమందికి చేరువైనట్లు తెలిపారు. కార్యక్రమంలో భాగంగా.. జనసైనికులు, వీర మహిళలతో జరిగిన సమావేశంలో పవన్ కళ్యాణ్ ఈ వ్యాఖ్యలు చేశారు. జనసేన పార్టీ ఆవిర్భావం నుంచి పనిచేసిన ముఖ్య కార్యకర్తలతో ఆయన సమావేశం అయ్యారు. పార్టీ అభివృద్ధి, భవిష్యత్ కార్యాచరణ, కూటమి సహకారం వంటి అంశాలపై వారితో చర్చించి.. వారి నుంచి అభిప్రాయాలను తీసుకున్నారు. జనసేన వీర మహిళలకు కత్తిసాము నేర్పించాలని తనకు అనిపిస్తుందని.. ఈ సమావేశంలో పవన్ సరదాగా వ్యాఖ్యానించారు. ఈ సందర్భంగా 2019 ఎన్నికల్లో ఓటమి గురించి.. పవన్ కళ్యాణ్ ప్రస్తావించారు. గత ఎన్నికల్లో ఓడిపోవడం.. తనకు ఒక గుణపాఠంగా అభివర్ణించారు. అవమానాలు పడేవాడు.. గుండె నిండా ఆశలు నింపుకున్నవాడు ముందుకు వెళ్లలేడని.. గుండెల్లో ఆశయాలు నింపుకుంటేనే జీవితంలో ముందుకు వెళ్తారని జనసేన కార్యకర్తలకు పవన్ కళ్యాణ్ సూచనలు చేశారు. 2019లో జనసేన పార్టీ ఓటమి పాలైనపుడు.. చాలామంది మనల్ని చూసి నవ్వుకుంటారని తనకు ముందే తెలుసని.. ఓటమి తర్వాత అందరినీ మళ్లీ సరైన దారిలో పెట్టేందుకు తాను చాలా కష్టపడినట్లు పవన్ కళ్యాణ్ చెప్పుకొచ్చారు. తనకు 21 సంవత్సరాల వయసు వచ్చినపుడే తనలో రాజకీయ ఆలోచనలు ప్రారంభమైనట్లు పవన్ కళ్యాణ్ వెల్లడించారు, అప్పుడే కమ్యూనిజం చదివానని తెలిపారు. ఏ పని ఎందుకు చేస్తానో.. తన కారణాలు తనకు ఉంటాయని, కొన్ని కఠినమైన నిర్ణయాలు కూడా తాను ధైర్యంగా తీసుకోగలనని చెప్పారు. గతంలో అధికారంలో ఉన్న వైసీపీ ప్రభుత్వం.. డబ్బులను పోగేసుకుంటే.. తాను మాత్రం మాటలు పోగేసుకుంటున్నానని జనసేనాని వెల్లడించారు. జనసేన పార్టీని నిలబెట్టేందుకే సినిమాలు చేస్తున్నానని చెప్పిన పవన్ కళ్యాణ్.. సినిమాల వల్లే తాను ఇంతమందికి దగ్గరైనట్లు స్పష్టం చేశారు. తనను, తన పార్టీని నమ్ముకున్న వారందరినీ సరైన స్థానాల్లో చూడడమే తనకు ఉన్న లక్ష్యమని చెప్పారు. అందుకు ఉదాహరణగా.. గతంలో కేవలం పీఏసీ ఛైర్మన్‌గా ఉన్న నాదెండ్ల మనోహర్ ఇప్పుడు మంత్రి అయ్యారని.. ఇదే జనసేన పార్టీ ఎదుగుదలకు నిదర్శనమని స్పష్టం చేశారు.