తెలంగాణ నేడు హైదరాబాద్ వాతావరణ శాఖ అధికారులు తెలిపారు. ఉదయం వాతావరణం పొడిగా.. కాస్త ఎండగా ఉంటుందని చెప్పారు. మధ్యాహ్నం తర్వాత ఆకాశం మేఘావృమై రాత్రి వరకు పలు జిల్లాల్లో తీవ్రమైన ఉరుములు, మెరుపులతో కూడిన భారీ వర్షాలు కురుస్తాయని వాతావరణ శాఖ హెచ్చరించింది. ఈ నేపథ్యంలో వికారాబాద్, సంగారెడ్డి, రంగారెడ్డి, మహబూబ్‌నగర్, వనపర్తి, నాగర్‌కర్నూల్, నారాయణపేట, గద్వాల్, నల్గొండ, సూర్యాపేట మరియు యాదాద్రి - భువనగిరి జిల్లాల ప్రజలు అత్యంత అప్రమత్తంగా ఉండాలని అధికారులు సూచించారు. ఈ ప్రాంతాల్లో పిడుగులు పడే అవకాశం కూడా ఉన్నందున.. ప్రజలు సురక్షిత ప్రాంతాలలో ఆశ్రయం తీసుకోవాలన్నారు. ఇక, రాష్ట్రంలోని మిగిలిన జిల్లాలలో అక్కడక్కడ తేలికపాటి నుండి మోస్తరు వర్షాలు కురిసే అవకాశం ఉందని చెప్పారు. ఇక హైదరాబాద్ నగరంలో విస్తారంగా, లేనప్పటికీ.. మధ్యాహ్నం నుంచి రాత్రి సమయంలో మోస్తరు వర్షం ఒక స్పెల్‌గా పడుతుందని వాతావరణ శాఖ తెలిపింది. ప్రస్తుతం.. రాబోయే రెండు గంటల్లో యాదాద్రి - భువనగిరి, జనగామ, నల్గొండ, నాగర్‌కర్నూల్, మహబూబ్‌నగర్, నారాయణపేట, వనపర్తి, వికారాబాద్, రంగారెడ్డి, సిద్దిపేట, మంచిర్యాల జిల్లాల్లో అక్కడక్కడ చిరుజల్లులు పడే అవకాశం ఉందని చెప్పారు. భారీ వర్షాలు ఉన్న ప్రాంతాలలో ప్రజలు ముందస్తు జాగ్రత్తలు తీసుకోవాలని, లోతట్టు ప్రాంతాల ప్రజలు అప్రమత్తంగా ఉండాలని అధికారులు సూచించారు. ఈ ఏడాది రికార్డుస్థాయి వర్షపాతంఈ ఏడాది రుతుపవనాలు ప్రారంభమైనప్పటి నుంచి అక్టోబర్ మాసం వరకు తెలంగాణ రాష్ట్రంలో భారీ వర్షాలు కురిసి, నదులు, వాగులు, వంకలు ఉధృతంగా ప్రవహించాయి. ముఖ్యంగా అక్టోబర్ నెలలో కురిసిన కుండపోత వర్షాలు గత రికార్డులను చెరిపేశాయి. ‘మొంథా తుఫాను’ ప్రభావం కారణంగా వర్షాలు బీభత్సం సృష్టించడంతో.. అక్టోబర్ మాసంలో రాష్ట్రంలో అత్యధికంగా 175 మి.మీ. వర్షపాతం నమోదైంది. అక్టోబర్‌లో సాధారణంగా 89.4 మి.మీ. వర్షపాతం నమోదు కావాల్సి ఉండగా.. ఈసారి ఏకంగా 96 శాతం అధికంగా వర్షపాతం నమోదైంది. ఇది అక్టోబర్ నెలలో ఒక చారిత్రక రికార్డుగా నిలిచింది.హనుమకొండ జిల్లాలోని భీమదేవరపల్లిలో కేవలం 24 గంటల్లోనే 422 మి.మీ. అత్యధిక వర్షపాతం నమోదైంది. మొత్తం మీద జూన్ నుంచి అక్టోబర్ నెల వరకు రాష్ట్రవ్యాప్తంగా సాధారణం కంటే 33 శాతం అధిక వర్షపాతం నమోదైనట్లు గణాంకాలు స్పష్టం చేస్తున్నాయి. గత సంవత్సరాల అక్టోబర్ వర్షపాతంతో పోలిస్తే (2021లో 80 మి.మీ., 2022లో 60 మి.మీ., 2023లో 95.9 మి.మీ.) ఈ ఏడాది నమోదైన 175 మి.మీ. వర్షపాతం రాష్ట్రంలో వర్ష తీవ్రతను తెలియజేస్తుంది.