హైదరాబాద్ నగరంలో చాలా ప్రాంతాలలో సంతోష్ ధాబా పేరుతో రెస్టారెంట్లు ఉండటం మనకు తెలిసిందే. అయితే.. వీటిలో అన్నీ నిజమైనవి కావు. ఈ నకిలీ ధాబాలు పెరిగిపోవడంపై సంతోష్ ధాబా (అబిడ్స్) అసలు యజమాని మనోజ్ కుమార్ సాంక్లా తాజాగా అభ్యంతరం వ్యక్తం చేశారు. సంతోష్ ధాబా పేరును చట్టవిరుద్ధంగా వాడుకుంటూ అనేక రెస్టారెంట్లు వ్యాపారం చేస్తున్నాయని ఆరోపిస్తూ మనోజ్ కుమార్ సాంక్లా న్యాయస్థానంలో కేసు దాఖలు చేశారు.అబిడ్స్‌లోని సంతోష్ ధాబా దశాబ్దాల చరిత్ర కలిగిన.. నగరంలోనే అత్యంత ప్రసిద్ధి చెందిన శాకాహార వంటకాల కేంద్రంగా ఉంది. ఈ బ్రాండ్‌కు ఉన్న గుర్తింపును, విశ్వసనీయతను ఉపయోగించుకోవడానికి ఇతర వ్యాపార సంస్థలు నకిలీ పేర్లను ఉపయోగిస్తున్నాయి. బ్రాండ్ పేరును రక్షించడానికి మనోజ్ కుమార్ సాంక్లాకు అనుకూలంగా కోర్టు ఆదేశాలు జారీ చేసింది. ఈ ఆదేశాల మేరకు 'సంతోష్ ధాబా' పేరుతో పనిచేస్తున్న అనేక ఆహారశాలలపై చర్యలు తీసుకోవడం ప్రారంభమైంది.నగరవ్యాప్తంగా చట్ట విరుద్ధంగా ఈ పేరును వాడుతున్న దాదాపు 50కి పైగా 'సంతోష్ ధాబా' బోర్డులను ఇప్పటికే తొలగించారు. బ్రాండ్ పేరును దుర్వినియోగం చేయడం వలన వినియోగదారులు నష్టపోయే ప్రమాదం ఉంది. అసలు సంతోష్ ధాబాలో ఉండే నాణ్యత, రుచి నకిలీ ధాబాలలో ఉండకపోవచ్చు. దీనివల్ల అసలు బ్రాండ్ గుడ్ విల్‌కు నష్టం కలుగుతోంది. బ్రాండ్‌ల యజమానులు తమ వ్యాపార నామాలను ట్రేడ్‌మార్క్ చట్టాల ద్వారా కాపాడుకోవడం ఎంత ముఖ్యమో ఈ ఘటన తెలియజేస్తోంది. వినియోగదారులు కూడా తమకు ఇష్టమైన రెస్టారెంట్ల విషయంలో అసలు, నకిలీ తేడాలను గుర్తించాలని అధికారులు సూచిస్తున్నారు. కొత్తగా వ్యాపారం ప్రారంభించేవారు త్వరగా గుర్తింపు పొందడం కోసం, ఇప్పటికే పేరున్న బ్రాండ్‌ల పేర్లను కొద్దిపాటి మార్పులతో కాపీ చేస్తున్నారు. ఈ నకిలీ పేర్ల వలన వినియోగదారులు తీవ్ర గందరగోళానికి గురవుతున్నారు. రుచి, నాణ్యతను ఆశించి నకిలీ ధాబాకు వెళ్లినప్పుడు.. అక్కడ నాణ్యతా లోపాలు కనిపిస్తున్నాయి. దీనివల్ల అసలు బ్రాండ్‌పై చెడ్డ అభిప్రాయం కలుగుతుంది. నకిలీ వ్యాపారాల కారణంగా నిజమైన బ్రాండ్‌ల యజమానులు ఆర్థికంగా నష్టపోవడంతో పాటు.. వారి సంస్థ గౌరవం (Goodwill) కూడా దెబ్బతింటుంది. సంతోష్ ధాబా యజమాని లాగే.. తమ వ్యాపార బ్రాండ్ గల బోర్డులను ఇతరులు ఉపయోగించకుండా కాపాడుకోవడానికి ట్రేడ్‌మార్క్ చట్టాల కింద న్యాయపోరాటం చేయడం ఒక్కటే శాశ్వత పరిష్కారం.