స్క్వాడ్ ప్రకటించిన రోజు అందరూ ఆశ్చర్యపోయారు. లేడీ సెహ్వాగ్‌గా పేరు తెచ్చుకున్న డాషింగ్ ఓపెనర్ పేరు స్క్వాడ్‌లో లేదు. భారత్ వేదికగా జరుగుతున్న ప్రతిష్టాత్మక టోర్నీలో కీలకమైన షఫాలీ వర్మను పక్కనబెట్టడమా? అన్న అనుమానాలు అందరిలోనూ రేకెత్తాయి. అయితే, ఆమె స్థానంలో జట్టులోకి తీసుకున్న ప్రతికా రావెల్ షఫాలీ లేని లోటును తీరుస్తూ అద్భుతంగా ఆడింది. కానీ.. షఫాలీ సడెన్ ఎంట్రీతో టీమిండియా వాతావరణమే ఒక్కసారిగా మారింది. ఏకంగా ఫైనల్‌లో కీలకంగా నిలిచి వరల్డ్ కప్ విజయంలో కీ రోల్ పోషించింది. సెమీ ఫైనల్స్‌కు ముందు బంగ్లాదేశ్‌తో జరిగిన మ్యాచ్‌లో టీమిండియా మహిళా జట్టు ఓపెనర్ ప్రతికా రావెల్ గాయపడింది. ఫీల్డింగ్ చేస్తున్న సమయంలో అవుట్ ఫీల్డ్ తడిగా ఉండటంతో బాల్ పట్టుకునే ప్రయత్నంలో గాయపడింది. ఫిజియోలు, వైద్యులు పరీక్షలు చేసిన అనంతరం విశ్రాంతి అవసరమని చెప్పారు. దాంతో షఫాలీ వర్మ ఒక్కసారిగా తెరపైకి వచ్చింది. ప్రతిష్టాత్మకమైన వన్డే వరల్డ్ కప్ సెమీ ఫైనల్, ఫైనల్‌ కోసం బీసీసీఐ ప్రతికా రావెల్‌కు రీప్లేస్‌మెంట్‌గా షఫాలీని జట్టులోకి తీసుకొచ్చింది. అయితే, ఆస్ట్రేలియాతో జరిగిన సెమీ ఫైనల్‌లో ఆరంభంలోనే వరుస బౌండరీలతో మెరిపించినా, ఆ వెంటనే కేవలం పది పరుగులు చేసి పెవిలియన్‌ బాట పట్టింది. ఆ మ్యాచ్‌లో నిరాశపెట్టినా ఫైనల్‌లో మాత్రం టీమిండియా ట్రంప్ కార్డుగా మారింది. సౌతాఫ్రికాతో జరిగిన ఫైనల్ పోరులో షఫాలీ వర్మ చూపిన అద్భుత ప్రదర్శన చరిత్రలో నిలిచిపోనుంది. స్మృతి మంధానతో కలిసి తొలి వికెట్‌కు 104 పరుగుల భాగస్వామ్యం నెలకొల్పింది. స్మృతి అవుటైనా కూడా క్రీజులో నిల్చొని తన ఫామ్‌ని కొనసాగిస్తూ బౌండరీలు బాదింది. 78 బంతులు ఆడిన షఫాలీ ఏడు ఫోర్లు, రెండు సిక్సర్లతో 87 పరుగులు చేసి అవుటయింది. షఫాలీ అద్భుత ప్రదర్శనతో భారత్ 298 పరుగులు చేయగలిగింది. భారత్‌కు దీటుగా సమాధానం ఇస్తూ సఫారీలు కూడా ఫైనల్‌లో అద్భుతంగా ఆడారు. తొలి వికెట్‌కు 51 పరుగుల భాగస్వామ్యం నెలకొల్పగా.. రెండో వికెట్‌కు 11 పరుగుల పార్ట్‌నర్‌షిప్పే ఇచ్చారు. అయితే లారా వోల్వార్ట్ - సునే లస్ మూడో వికెట్‌కు 52 పరుగుల భాగస్వామ్యం నెలకొల్పి విజయం వైపు దూసుకుపోతున్నారు. ఇదే సమయంలో టీమిండియా కెప్టెన్ హర్మన్ ప్రీత్ కౌర్ ట్రంప్ కార్డ్‌గా షఫాలీ వర్మను ప్రయోగించింది. తాను వేసిన మొదటి ఓవర్‌లోనే వికెట్ తీసుకుని సఫారీ భాగస్వామ్యాన్ని బ్రేక్ చేసేసింది. వరుస ఓవర్లలో రెండు వికెట్లు తీసి షఫాలీ వర్మ సౌతాఫ్రికాను దెబ్బతీసింది. ఏడు ఓవర్లు బౌలింగ్ చేసిన షఫాలీ 36 పరుగులే ఇచ్చి రెండు కీలక వికెట్లు తీసుకుంది. బ్యాటింగ్‌లో కూడా 87 పరుగులు చేయడంతో ప్లేయర్ ఆఫ్ ది మ్యాచ్ అవార్డును సొంతం చేసుకుంది. వద్దనుకుని పక్కనబెట్టిన ప్లేయరే ఇవాళ టీమిండియాకు వన్డే వరల్డ్ కప్ అందించింది.