اکھلیش یادو نے اتر پردیش میں برسر اقتدار بی جے پی حکومت پر سخت تنقید کرتے ہوئے الزام عائد کیا ہے کہ ریاست میں کسانوں کو نظرانداز کیا جا رہا ہے اور حالیہ غیر موسمی بارش، آندھی اور ژالہ باری سے ہونے والے نقصانات کے باوجود انہیں کوئی مناسب راحت فراہم نہیں کی گئی۔سماجوادی پارٹی کے قومی صدر نے اتوار کے روز جاری ایک بیان میں کہا کہ ریاست کے متعدد اضلاع میں فصلوں کو بڑے پیمانے پر نقصان پہنچا ہے۔ انہوں نے مئن پوری، قنوج، بارہ بنکی، سیتاپور، ہاتھرس، ایودھیا، میرٹھ، پیلی بھیت، متھرا، ہردوئی، سون بھدر اور شراوستی سمیت کئی علاقوں کا حوالہ دیتے ہوئے کہا کہ بارش کی وجہ سے گندم کی فصل بھیگ کر خراب ہوگئی ہے جبکہ کئی جگہوں پر فصلیں گر کر مکمل طور پر تباہ ہو چکی ہیں۔اکھلیش یادو نے الزام لگایا کہ اس بڑے نقصان کے باوجود کسانوں کو ابھی تک نہ تو معاوضہ دیا گیا ہے اور نہ ہی کوئی مؤثر راحتی اقدامات کیے گئے ہیں۔ ان کے مطابق ریاستی حکومت کے وزراء صرف اعلانات اور ہوائی جائزوں تک محدود ہیں، جبکہ زمینی سطح پر کسانوں کو کوئی حقیقی مدد نہیں مل رہی۔انہوں نے کہا کہ کسان پہلے ہی بڑھتی ہوئی لاگتِ کاشت سے پریشان ہیں اور اب قدرتی آفات نے ان کی مشکلات میں مزید اضافہ کر دیا ہے۔ ان کا کہنا تھا کہ ایک طرف کھاد، بیج اور دیگر زرعی اخراجات میں اضافہ ہو رہا ہے، دوسری جانب فصلوں کی تباہی نے کسانوں کو شدید مالی بحران میں دھکیل دیا ہے۔سابق وزیر اعلیٰ نے یہ بھی الزام لگایا کہ کسانوں کی فصلوں کی خریداری مناسب طریقے سے نہیں ہو رہی اور انہیں اپنی پیداوار کا صحیح دام بھی نہیں مل رہا۔ خاص طور پر آلو کے کسانوں کا ذکر کرتے ہوئے انہوں نے کہا کہ انہیں اپنی محنت کا مناسب معاوضہ نہیں ملا، جس کے باعث انہیں بھاری نقصان اٹھانا پڑا ہے۔اکھلیش یادو نے منڈی نظام کو لے کر بھی حکومت کو تنقید کا نشانہ بنایا۔ ان کے مطابق موجودہ حکومت نے منڈیوں کے نظام کو کمزور کر دیا ہے، جبکہ ان کی حکومت کے دور میں نئی منڈیوں کی تعمیر اور بہتری پر کام جاری تھا۔ انہوں نے کہا کہ منڈی نظام کی کمزوری کا براہ راست اثر کسانوں کی آمدنی پر پڑ رہا ہے۔انہوں نے مزید کہا کہ موجودہ حکومت صنعت کاروں کے مفاد میں کام کر رہی ہے اور کسانوں کے مسائل کو نظرانداز کیا جا رہا ہے۔ انہوں نے دعویٰ کیا کہ اتر پردیش کا کسان آنے والے 2027 کے اسمبلی انتخابات میں اس رویے کا جواب دے گا اور سماجوادی پارٹی اقتدار میں واپس لائے گا۔