لوک سبھا میں حزب اختلاف کے قائد راہل گاندھی نے کولمبیا میں مودی حکومت کے خلاف جو بیانات گزشتہ دنوں دیے تھے، اس کو بی جے پی لیڈران مستقل تنقید کا نشانہ بنا رہے ہیں۔ اب کانگریس نے بی جے پی کے تبصرہ پر جوابی حملہ کیا ہے۔ کانگریس جنرل سکریٹری کے سی وینوگوپال نے اس تعلق سے کہا ہے کہ ’’خواہ کولمبیا میں بولا جائے یا کانپور میں، سچائی یہ ہے کہ بی جے پی حکومت اقتصادی محاذ پر ناکام ہو رہی ہے اور جمہوری نظام پر قبضہ کی کوشش کے سبب پوری دنیا میں ہندوستان کی بدنامی ہو رہی ہے۔‘‘ انہوں نے یہ بھی الزام عائد کیا کہ وزیر اعظم بننے سے قبل اور اس کے بعد کئی سالوں تک نریندر مودی نے اپنے غیر ملکی سفر کا استعمال نہ صرف کانگریس کو بدنام کرنے کے لیے کیا بلکہ ہندوستان اور اس کے عوام کی توہین بھی کی۔The BJP’s habit is to blame the Congress for its own failures bringing us international shame. Whether it is said in Colombia or Kanpur, the reality remains the same - India’s government has failed to harness the vast potential of our economy and is undoing our demographic…— K C Venugopal (@kcvenugopalmp) October 4, 2025کے سی وینوگوپال نے سوشل میڈیا پلیٹ فارم ’ایکس‘ پر جاری کردہ ایک پوسٹ میں لکھا کہ ’’بی جے پی کی عادت ہے اپنی ناکامیوں کے لیے کانگریس کو ذمہ دار ٹھہرانے کی، جس کے سبب ہمیں بین الاقوامی سطح پر شرمندگی اٹھانی پڑ رہی ہے۔ خواہ یہ کولمبیا میں کہی جائے یا کانپور میں، حقیقت یہی ہے کہ ہندوستانی حکومت ہماری معیشت کی بے پناہ صلاحیت کو استعمال کرنے میں ناکام رہی ہے اور ہمارے آبادیاتی منافع کو برباد کر رہی ہے۔‘‘ ساتھ ہی انہوں نے دعویٰ کیا کہ جمہوری نظام پر قبضہ کرنا ایک ایسا معاملہ ہے جس نے ہمیں پوری دنیا میں بدنام کیا ہے، جس کا سہرا بی جے پی کو ہی جاتا ہے۔کے سی وینو گوپال کے مطابق ’’حق بیانی کے لیے راہل جی پر حملہ کرنے کی یہ بی جے پی کی پرانی اور گمراہ کرنے والی پالیسی ہے۔ ان کے لیے بہتر ہوگا کہ وہ راہل گاندھی کے بیانوں پر باریکی سے دھیان دیں اور ان سنگین خامیوں کی اصلاح کے لیے کارروائی کریں، جنہیں وہ 2014 سے بے نقاب کر رہے ہیں۔‘‘ کانگریس جنرل سکریٹری کے مطابق بی جے پی کی غلط حکمرانی، بدعنوانی اور غیر جمہوری کردار کو راہل گاندھی مستقل بے نقاب کر رہے ہیں، اور اس پر سوال اٹھانا واضح طور پر منافقت ہے۔