లో సౌతాఫ్రికా తిరుగులేని జట్టుగా సెమీ ఫైనల్‌లో అడుగుపెట్టింది. గ్రూప్ స్టేజ్ మొదలు ఇప్పటి వరకు ఓటమి ఎరుగకుండా ఉన్న ఏకైక జట్టు సౌతాఫ్రికా మాత్రమే. సెమీఫైనల్‌లో అడుగుపెట్టిన భారత్, ఇంగ్లండ్, న్యూజిలాండ్ అన్నీ జట్లు ఏదోక మ్యాచ్‌లో ఓడిపోయాయి కానీ సఫారీలు ఓడిపోలేదు. అయితే సెమీఫైనల్స్‌కు ముందు దక్షిణాఫ్రికాకు న్యూజిలాండ్ భయం పట్టుకుంది. ఎందుకంటే ఐసీసీ ఈవెంట్లలో సౌతాఫ్రికా నాకౌట్‌కు చేరుకున్న ప్రతిసారీ న్యూజిలాండ్ చేతిలోనే ఓడిపోయింది. ఈ టీ20 వరల్డ్‌కప్ మొదటి సెమీఫైనల్‌లో జట్లు తలపడుతున్నాయి. ఈడెన్ గార్డెన్స్ వేదికగా జరిగే ఈ మ్యాచ్ రసవత్తరంగా మారింది. ఈ టోర్నీలో సౌతాఫ్రికా దిగ్విజయంగా ముందుకు సాగితే.. అదృష్టంతో న్యూజిలాండ్ సెమీఫైనల్‌లో అడుగుపెట్టింది. ఈ మ్యాచ్ బుధవారం రాత్రి 7 గంటలకు ప్రారంభం కానుంది. ఐసీసీ ఈవెంట్లలో సౌతాఫ్రికా - న్యూజిలాండ్ మూడుసార్లు నాకౌట్స్‌లో తలపడ్డాయి. ఈ మూడుసార్లూ న్యూజిలాండే విజయం సాధించింది. ముఖ్యంగా 2015 వన్డే వరల్డ్‌కప్ సెమీఫైనల్ మాత్రం సౌతాఫ్రికా జట్టుకు కాళరాత్రినే మిగిల్చింది. మోర్నీ మోర్కెల్, ఏబీ డివిలియర్స్‌తో కూడిన మేటి జట్టు ఉన్నప్పటికీ సౌతాఫ్రికా సెమీఫైనల్ దాటలేక గ్రౌండ్‌లోనే ఏడుస్తూ కూలబడింది. దాంతో న్యూజిలాండ్ సెమీఫైనల్‌కు వచ్చిందంటేనే సౌతాఫ్రికాకు టెన్షన్ మొదలవుతుంది. 2011 వన్డే వరల్డ్‌‌కప్ క్వార్టర్ ఫైనల్‌లో న్యూజిలాండ్ జట్టు సౌతాఫ్రికాపై 49 పరుగుల తేడాతో ఘన విజయం సాధించింది. 2015 వన్డే వరల్డ్‌కప్ సెమీఫైనల్‌లో న్యూజిలాండ్ నాలుగు వికెట్ల తేడాతో ఆఖరి ఓవర్‌లో సఫారీలను ఓడించింది. 2025 ఛాంపియన్స్ ట్రోఫీలోనూ లాహోర్ వేదికగా జరిగిన సెమీఫైనల్‌లో న్యూజిలాండ్ 50 పరుగుల తేడాతో గెలిచింది. అయితే సెమీ ఫైనల్స్‌లో మంచి ట్రాక్ రికార్డు ఉన్న న్యూజిలాండ్, ఫైనల్‌లో ఒక్కసారి కూడా గెలవలేదు. ఈ రికార్డు సౌతాఫ్రికాను భయపెడుతున్నా.. ప్రస్తుత టీ20 వరల్డ్‌కప్‌లో ఆ జట్టు మంచి ఫామ్‌లో ఉండటం కలిసొచ్చే అంశం. అటు బ్యాటింగ్, ఇటు బౌలింగ్‌తో సఫారీలు తిరుగులేని జట్టుగా దూసుకెళ్తున్నారు. మరి ఈడెన్ గార్డెన్స్ వేదికగా జరగనున్న తొలి సెమీఫైనల్‌లో ఎలాంటి ఫలితం వస్తుందో వేచి చూడాలి.