తమ ఉద్యోగులకు సంబంధించిన డ్రెస్ కోడ్ నిబంధనలపై సోషల్ మీడియాలో తీవ్ర విమర్శలు రావటంతో ప్రముఖ కళ్లజోళ్ల సంస్థ లెన్స్‌కార్ట్.. ఉద్యోగుల కోసం కొత్త స్టైల్ గైడ్ విడుదల చేసింది. నుదుటన సిందూరం, తిలకం, తలపాగా, హిజాబ్ అన్నింటినీ స్వాగతిస్తామని లెన్స్‌కార్ట్ సంస్థ తెలిపింది. తమ టీమ్ సభ్యులు పాటించే ఆచారాలను గౌరవిస్తామని.. సంస్కృతికి చిహ్నాలు అయినా బిందీ, తిలకం, హిజాబ్, కడా, మంగళసూత్రం, తలపాగా అన్నింటినీ స్వాగతిస్తున్నట్లు ఓ ప్రకటనలో వెల్లడించింది. హిజాబ్‌ ధరించేందుకు అనుమతిస్తున్నారని.. అయితే బిందీ, తిలకం వంటి వాటిని ధరించకూడదని స్టైల్‌గైడ్‌లో లెన్స్‌కార్ట్ పేర్కొందంటూ సోషల్ మీడియాలో ఆరోపణలు వచ్చాయి. అయితే అది పాత స్టైల్‌ గైడ్‌ అంటూ లెన్స్‌కార్ట్‌ ఫౌండర్, సీఈవో పీయూశ్‌ బన్సల్‌ వివరణ ఇచ్చారు. అయినప్పటికీ ఆ వివాదం ఆగకపోవటంతో.. లెన్స్‌కార్ట్ కొత్త స్టైల్ గైడ్ తీసుకువచ్చింది. కస్టమర్లు, ప్రజల అభిప్రాయాలను విన్నా మని.. కొత్త స్టైల్ గైడ్ తీసుకువచ్చినట్లు తెలిపింది. లెన్స్‌కార్డ్ టీమ్ సభ్యులలో ఎవరికైనా బాధ కలిగించినా, వారి విశ్వాసాన్ని స్వాగతించరనే భావన వచ్చినా, మేము మనస్ఫూర్తిగా క్షమాపణలు కోరుతున్నామని లెన్స్‌కార్ట్ ఓ ప్రకటనలో కోరింది. అయితే లెన్స్‌కార్ట్ వివరణతో నెటిజన్లు పూర్తిగా సంతృప్తి చెందడం లేదు. తప్పు జరిగిందని నిజంగా క్షమాపణలు చెప్పటం లేదంటూ కొంతమంది నెటిజన్లు ట్వీట్ చేస్తున్నారు. మరికొందరు లెన్స్‌కార్ట్ చాలా ఆలస్యంగా స్పందించిందని అభిప్రాయపడుతున్నారు. జరగాల్సిన నష్టం జరిగిపోయాక ఇప్పుడు స్పందించి ఏం ప్రయోజనమంటూ మరికొందరు కామెంట్లు పెడుతున్నారు. ఇంతకీ ఏం జరిగిందంటే..?లెన్స్‌కార్ట్ ఉద్యోగుల స్టైల్ గైడ్ అంటూ సోషల్ మీడియాలో కొన్ని పాయింట్లు వైరల్ అయ్యాయి. వైరల్ అయిన స్టైల్ గైడ్ ప్రకారం.. లెన్స్‌కార్ట్ స్టోర్లలో సిబ్బంది నలుపు రంగు హెడ్‌స్కార్ఫ్‌, నల్లరంగు తలపాగాలు ధరించేందుకు అనుమతి ఉంది. అయితే నుదుటన సింధూరం, తిలకం వంటివి పెట్టుకోవడానికి అనుమతి లేదు. ఇది నెట్టింట్లో వైరల్ కావటంతో లెన్స్‌కార్ట్ మీద తీవ్ర విమర్శలు వ్యక్తమయ్యాయి. మతపరమైన పక్షపాతం చూపిస్తోందంటూ సోషల్ మీడియాలో నెటిజన్లు మండిపడ్డారు. అయితే ఇది అసత్యప్రచారమని.. తాము ఎప్పటికప్పుడు తమ మార్గదర్శకాలను సమీక్షిస్తున్నామని తెలిపింది. పాత విధానాలు ప్రస్తుత పరిస్థితులను ప్రతిబింబించవని పేర్కొంటూ.. గందరగోళంపై క్షమాపణలు కోరింది.