తెలంగాణ రాష్ట్రాన్ని ప్రస్తుతం గత కొద్ది రోజులుగా క్రమంగా తగ్గుతూ వస్తున్న ఉష్ణోగ్రతలు.. ఆదివారం రాత్రి నుండి సోమవారం ఉదయం నాటికి కనిష్ఠ స్థాయికి పడిపోయాయి. రాష్ట్రంలోని దాదాపు అన్ని జిల్లాల్లోనూ వీస్తున్న శీతల గాలుల వల్ల జనజీవనం స్తంభించిపోతోంది. ముఖ్యంగా కుమురంభీం ఆసిఫాబాద్‌ జిల్లాలోని తిర్యాణిలో అత్యల్పంగా 6.1 డిగ్రీల ఉష్ణోగ్రత నమోదు కావడం పరిస్థితి తీవ్రతకు అద్దం పడుతోంది. సంగారెడ్డి, ఆదిలాబాద్, రంగారెడ్డి వంటి జిల్లాల్లో కూడా ఉష్ణోగ్రతలు 10 డిగ్రీల కంటే చాలా తక్కువగా నమోదవుతున్నాయి. రానున్న రెండు రోజుల్లో ఈ చలి తీవ్రత మరింత పెరిగే అవకాశం ఉందని వాతావరణ శాఖ హెచ్చరిస్తోంది. మనల్ని మనం రక్షించుకోవడానికి కొన్ని కీలకమైన జాగ్రత్తలు పాటించడం తప్పనిసరి. చలి తీవ్రత ఎక్కువగా ఉండే రాత్రి వేళల్లో, తెల్లవారుజామున బయటకు రాకపోవడమే మంచిది. ఒకవేళ బయటకు వెళ్లాల్సి వస్తే.. శరీరం మొత్తం కప్పేలా మందపాటి ఉన్ని దుస్తులు, గ్లౌజులు, చెవులకు రక్షణగా మఫ్లర్లు లేదా మంకీ క్యాప్‌లను ధరించాలి. రక్త ప్రసరణ సరిగ్గా జరగడానికి, శరీర ఉష్ణోగ్రతను స్థిరంగా ఉంచుకోవడానికి కాళ్లకు సాక్సులు ధరించడం చాలా ముఖ్యం.ఆరోగ్య పరంగా చూస్తే.. చలికాలంలో వ్యాధి నిరోధక శక్తి తగ్గే అవకాశం ఉంటుంది. కాబట్టి ఆహారం విషయంలో ప్రత్యేక శ్రద్ధ వహించాలి. ఎప్పుడూ వేడిగా ఉండే తాజా ఆహారాన్ని తీసుకోవాలి. రోజూ గోరువెచ్చని నీటిని తాగడం వల్ల గొంతు సమస్యలు రాకుండా ఉంటాయి. శరీరం హైడ్రేటెడ్‌గానూ ఉంటుంది. అల్లం టీ, కషాయం లేదా పాలలో పసుపు వేసుకుని తాగడం వల్ల జలుబు, దగ్గు వంటి సమస్యల నుండి ఉపశమనం లభిస్తుంది. అలాగే విటమిన్-సి ఎక్కువగా ఉండే పండ్లు తీసుకోవడం వల్ల రోగనిరోధక శక్తి పెరుగుతుంది.ముఖ్యంగా చిన్నపిల్లలు, వృద్ధుల విషయంలో మరింత అప్రమత్తంగా ఉండాలి. వారికి చలి త్వరగా ప్రభావం చూపుతుంది కాబట్టి ఎప్పుడూ వెచ్చగా ఉంచాలి. శ్వాసకోశ సంబంధిత సమస్యలు లేదా ఆస్తమా ఉన్నవారు ఇన్హేలర్లను దగ్గర ఉంచుకోవాలి. పొగమంచులో తిరగకూడదు. ఇంట్లో గాలి వెలుతురు ఉండేలా చూసుకుంటూనే.. కిటికీల నుండి చలి గాలి రాకుండా జాగ్రత్త పడాలి. రాత్రిపూట నిప్పు సెగ వేసుకునే వారు తలుపులు పూర్తిగా మూసివేయకూడదు, ఎందుకంటే కార్బన్ మోనాక్సైడ్ వల్ల ప్రమాదాలు జరిగే అవకాశం ఉంది. ఈ చిన్నపాటి జాగ్రత్తలతో చలికాలం వల్ల కలిగే ఆరోగ్య సమస్యల నుండి మనల్ని మనం కాపాడుకోవచ్చు.