ఇది ప్రేమా.. ప్రేమ మైకమా.? పట్టుమని 20 ఏళ్లు కూడా లేకుండానే.. నక్కతోలు కప్పుకున్న మేక వన్నె పులులు తిరిగే సమాజ స్థితి గతులపై కనీస అవగాహన లేకుండానే.. ఉబికి వచ్చే హార్మోన్ల ప్రభావమో.. ఉప్పొంగే యవ్వనపు మోహమో కానీ.. ప్రేమ మత్తులో, క్షణికావేశంలో కొంతమంది యువత తీసుకుంటున్న నిర్ణయాలు కన్నోళ్లకు కన్నీరు మిగుల్చుతున్నాయి. నవమాసాలు మోసి కని పెంచిన ఆ తల్లి, బిడ్డ బంగరు భవిష్యత్తుపై గంపెడాశలు పెట్టుకుంటుంది.. ప్రపంచంలోకి అడుగుపెట్టిన దగ్గర నుంచి తనను ఓ మహరాణిగానో, మహారాజుగానో భావించి పెంచే ఆ తండ్రి.. రేప్పొద్దున మలిసంధ్యలో తోడుగా ఉంటారని కోటి ఆశలు పెట్టుకుంటాడు. కానీ.. వారి ఆశలు అడియాసలు అవుతున్నాయి. క్షణికావేశంలో తీసుకుంటున్న కఠిన నిర్ణయాలు.. తీరని వేదనను, అంతులేని ఆవేదనను మిగుల్చుతున్నాయి. అలాంటి ఘటనే అనకాపల్లి జిల్లా కోటరవుట్లలో చోటుచేసుకుంది. ఇంటర్మీడియట్ సెకండ్ ఇయర్ చదువుతున్న ఓ 17 ఏళ్ల బాలిక తీసుకున్న నిర్ణయం.. కన్నోళ్లకు కడుపుకోతను మిగిల్చింది. పోలీసులు చెప్తున్న వివరాల ప్రకారం.. కోటరవుట్ల ప్రాంతానికి చెందిన ఓ 17 ఏళ్ల బాలిక.. స్థానికంగా ఉండే ఓ కాలేజీలో ఇంటర్ సెకండియర్ చదువుతోంది. అయితే ఏమైందో తెలియదు.. సోమవారం రోజున ఇంట్లో ఎవరూ లేని సమయంలో ఫ్యానుకు చీరతో ఉరేసుకుని బలవన్మరణానికి పాల్పడింది. ఈ విషయం తెలుసుకున్న పోలీసులు ఘటనాస్థలికి చేరుకున్నారు. అసలేం జరిగిందనే దానిపై కుటుంబసభ్యులను ఆరా తీశారు. కుటుంబసభ్యులు చెప్తున్న వివరాల ప్రకారం.. ఆ బాలికను కుమార్ అనే యువకుడు వేధిస్తున్నాడు. జూనియర్ కాలేజీ దగ్గర ఆమెతో గొడవపడ్డాడు. ఇది తట్టుకోలేక ఆ బాలిక ఆత్మహత్య చేసుకుందని ఆమె తల్లిదండ్రులు చెప్తున్నారు. ఇదే విషయంపై పోలీసులకు ఫిర్యాదు చేశారు. దీంతో కుమార్‍‌ను పోలీసులు అదుపులోకి తీసుకుని విచారణ జరుపుతున్నారు.అయితే పోలీసుల వెర్షన్ మరోలా ఉంది. లోకేష్‌ను ప్రేమిస్తున్నానని, అతను లేకపోతే జీవించలేనని.. అలాగే కుమార్‌‌ను కూడా ప్రేమిస్తున్నానని.. తన కారణంగా తన తల్లిదండ్రులకు చెడ్డపేరు రావొద్దంటూ ఆత్మహత్య చేసుకుంటున్నానని బాలిక ఆత్మహత్య చేసుకోవడానికి ముందు ఓ లేఖ రాసిందని పోలీసులు చెప్తున్నారు. బాలిక రాసిన లేఖను స్వాధీనం చేసుకున్నట్లు వెల్లడించారు. పోలీసుల వాదన ఒకలా.. తల్లిదండ్రుల వర్షన్ మరోలా ఉండటంతో ఈ కేసు స్థానికంగా ప్రాధాన్యం సంతరించుకుంది. ఏదేమైనా 17 ఏళ్లకే ప్రేమ ఏమిటంటూ స్థానికులు చర్చించుకుంటున్నారు.