جنیوا (یکم جنوری 2026): سوئٹزرلینڈ میں نیو ایئر پارٹی کے دوران بار میں دھماکے میں ہلاکتوں کی تعداد 40 ہوگئی 100 سے زائد زخمی ہیں۔غیر ملکی میڈیا کے مطابق سوئٹزرلینڈ میں اسکی ریزورٹ کے بار میں دھماکا ہوا ہے۔ دھماکے کے نتیجے میں آگ لگ گئی جب کہ دھماکے کے واقعہ میں ہلاکتوں کی تعداد مسلسل بڑھتی جا رہی ہے۔مقامی میڈیا کے مطابق سوئٹزرلینڈکےاسکی ریزورٹ ’’کرانزمونٹانا‘‘کے بار میں دھماکے کے نتیجے میں ہلاکتوں کی تعداد 40 تک جا پہنچی ہے جب کہ 100 سے زائد زخمی ہیں۔پولیس کا کہنا ہے کہ دھماکا اس وقت ہوا، جب اسکی ریزورٹ میں سال نو کے جشن کی پارٹی جاری تھی اور لوگوں کی بڑی تعداد بار میں موجود تھی۔دھماکے کی شدت اتنی زیادہ تھی کہ قریبی عمارتوں کے شیشے ٹوٹ گئے۔ پولیس نے عوام کو متاثرہ علاقے سے دور رہنے کی ہدایت کی ہے۔پولیس کا کہنا ہے کہ دھماکے کے بعد آگ لگی، تاہم واقعہ دہشتگردی نہیں ہے۔ حکام کا کہنا ہے کہ واقعے سے متعلق مزید تفصیلات کی تصدیق کے بعد میڈیا کو آگاہ کیا جائے گا۔واضح رہے کہ جنوری کے آخر میں اس شہر میں اسپیڈ اسکیئنگ کا ورلڈ کپ بھی ہونے والا ہے۔