(یکم جنوری 2026): طبی دنیا کا حیرت انگیز واقعہ سامنے آیا ہے اور سرجری کے بعد نوجوان کے معدے سے 7 ٹوتھ برش اور 2 پانے (رینچ) نکال لیے گئے۔بعض اوقات طبی شعبہ سے ایسے واقعات سامنے آتے ہیں، جن پر یقین کرنا مشکل ہوتا ہے، مگر وہ حقیقت ہوتے ہیں۔ ایسا ہی ایک انوکھا واقعہ بھارت میں پیش آیا، جہاں نوجوان کے معدے سے سرجری کے بعد 7 ٹوتھ برش اور دو پانے نکالے گئے۔ اس واقعہ کو طبی تاریخ کا حیران کن واقعہ بھی قرار دیا جا رہا ہے۔بھارتی میڈیا کے مطابق 26 سالہ نوجوان پانچ روز قبل شدید پیٹ کے درد کی شکایت کے ساتھ جے پور کے اسپتال لایا گیا۔ مریض کی تشویشناک حالت دیکھتے ہوئے ڈاکٹروں نے فوری طور پر اس کے ٹیسٹ کیے اور پیٹ کی سونو گرافی جب سامنے آئی تو ڈاکٹرز یہ دیکھ کر حیران رہ گئے کہ اس کے معدے میں متعدد سخت اور نوکیلی اشیا موجود تھیں۔رپورٹ کے مطابق اسپتال کے سینئر سرجن ڈاکٹر تنمے پاریکھ کے مطابق نوکیلی اشیا نوجوان کے معدے کی دیوار تک جا پہنچی تھیں اور وہ کسی بھی وقت جان لیوا ثابت ہو سکتی تھیں، اسی لیے ڈاکٹرز نے فوری طور پر نوجوان کے آپریشن کا فیصلہ کیا۔یہ پیچیدہ آپریشن دو گھنٹے سے زائد جاری رہا، جس میں ڈاکٹروں نے نوجوان مریض کے معدے سے 7 ٹوتھ برش اور دو لوہے کے پانے (رینچ) نکال لیے۔ڈاکٹروں کا کہنا ہے نوجوان ذہنی مریض ہے اور وہ کھانے کے قابل نہ ہونے والی اشیا نگل لیتا تھا۔