New Year Orders: నూతన సంవత్సరం వేళ ప్రముఖ ఆన్‌లైన్ ఫుడ్ డెలివరీ ప్లాట్ ఫామ్ జొమాటో, క్విక్ కామర్స్ ప్లాట్ ఫారం బ్లింకిట్ అదరగొట్టాయి. ఒక్కరోజులోనే భారీ ఆర్డర్లు అందుకుని సరికొత్త రికార్డ్ నెలకొల్పాయి. ప్రముఖ ఈ-కామర్స్ సంస్థ ఎటెర్నెల్‌కు చెందిన ఈ రెండు సంస్థలూ డిసెంబర్ 31వ తేదీన ఒక్క రోజే ఏకంగా 75 లక్షల ఆర్డర్లు అందుకున్నాయి. ఈ విషయాన్ని ఆ కంపెనీ వ్యవస్థాపకుడు స్వయంగా సోషల్ మీడియా ఎక్స్ వేదికగా వెల్లడించారు. గిగ్ వర్కర్ల సమ్మె ప్రభావం తమ డెలివరీలు, వ్యాపార కార్యకలాపాలపై పడలేదని తెలిపారు.డిసెంబర్ 31 బుధవారం ఒక్కరోజే ఎన్నడూ లేని విధంగా 63 లక్షల మంది తమ ప్లాట్ ఫామ్స్ ఉపయోగించుకున్నట్లు దీపిందర్ గోయల్ తెలిపారు. ఆయా కస్టమర్ల నుంచి మొత్తం 75 లక్షల ఆర్డర్లు వచ్చాయని తన పోస్ట్‌లో తెలిపారు. మొత్తం 4.5 లక్షల మందికి పైగా డెలివరీ పార్టనర్లు ఇందుకోసం పని చేసినట్లు పేర్కొన్నారు. కొత్త సంవత్సరం ముందు రోజు ప్రతి ఏటా చెల్లించే ప్రోత్సాహకాల మాదిరిగానే ఈ సంవత్సరం సైతం చెల్లింపులు చేశామని వెల్లడించారు. ఈసారి అదనంగా ఏమీ చెల్లించలేదని తెలిపారు. ఈ క్రమంలో దీపిందర్ గోయల్ క్లారిటీ ఇచ్చినట్లు అర్థమవుతోంది. క్షేత్ర స్థాయిలో డెలివరీ పార్ట్నర్ల కృషి వల్లే రికార్డు ఆర్డర్లు సాధ్యమైనట్లు కొనియాడారు.ఈ పని విధానమే పూర్తిగా అవాస్తమైతే పెద్ద సంఖ్యలో ఇందులో పని చేసేందుకు ఎందుకు ముందుకొస్తారని ప్రశ్నించారు. ఒక వేళ అలా వచ్చినా ఎక్కువ కాలం కొనసాగుతున్నారని పేర్కొన్నారు. స్వార్థ ప్రయోజనాల కోసం కొందరు చేసే ప్రచారాలను నమ్మవద్దని గిగ్ వర్కర్లకు సూచించారు. దేశంలో అత్యధిక మందికి ఉపాధి అవకాశాలు కల్పిస్తున్నది ఈ గిగ్ ఎకానమీ అని దీపిందర్ గోయల్ పేర్కొన్నారు. కొందరి కారణంగా డెలివరీ పార్టనర్లు నష్టపోవద్దని సూచించారు.