: . ఈసారి కూడా ప్రతి ఏడాదిలానే న్యూ ఇయర్ వేడుకల్లో భారతీయులు.. ఆన్‌లైన్ ఫుడ్, క్విక్ కామర్స్ ప్లాట్‌ఫారంలలో ఆహారం, ఇతర వస్తువుల కోసం తెగ ఆర్డర్లు చేశారు. అయితే ఈ సారి ట్రెండ్ పూర్తిగా మారింది. ఎక్కువగా బిర్యానీ, పిజ్జా డెలివరీలు అవుతుంటాయి కానీ ఈసారి అక్కడితోనే ఆగిపోకుండా.. ద్రాక్ష పండ్లు, లగ్జరీ ఐఫోన్లు, చివరకు లక్షల్లో విలువైన ఐఫోన్స్ కూడా ఆర్డర్ చేయడం విశేషం. ముఖ్యంగా ఈసారి కొత్త సంవత్సరం వేడుకల్లో భాగంగా.. డిసెంబర్ 31 నుంచి తెల్లవారుజాము వరకు చూస్తే ద్రాక్ష పండ్లు (గ్రేప్స్) హాట్ కేకుల్లా అమ్ముడుబోయాయి. దీనికి కారణం.. ఒక స్పానిష్ సంప్రదాయం గురించి సోషల్ మీడియాలో వైరల్ అవడమే. ఏడాదంతా కలిసొస్తుందన్న నమ్మకంతో ఈసారి వీటికి డిమాండ్ పెరిగింది. సోషల్ మీడియాలో ఈ ట్రెండ్ వైరల్ కావడంతో.. డిసెంబర్ 31న తెల్లవారుజామున 5 గంటలకే సుమారుగా 2,35,000 మంది గ్రేప్స్ కోసం స్విగ్గీలో వెతికారు. ఇంకా అర్ధరాత్రికి గంటన్నర ముందు వీటికి ఇంకా ఎక్కువ డిమాండ్ కనిపించింది. సాధారణం కంటే 15 రెట్ల మేర వీటికి ఆర్డర్లు పెరిగాయి. ఇక భారతీయుల పార్టీ అంటే బిర్యానీ లేకుంటే ఎలా. దీనికి ఎప్పటిలానే మంచి డిమాండ్ కనిపించింది. 2025 ముగింపు వేళ బిర్యానీ ఆర్డర్లలోనూ రికార్డులు బద్ధలయ్యాయి. డిసెంబర్ 31 రాత్రి 8 గంటల సమయంలో నిమిషానికి సగటున 1336 చొప్పున నమోదయ్యాయి. ఇక భువనేశ్వర్‌కు చెందిన ఒక కస్టమర్ ఒకే ఆర్డర్‌లో ఏకంగా 16 కిలోల బిర్యానీని తెప్పించుకోవడం విశేషం. ఇక రాత్రి 8.30 గంటల వరకు 2.18 లక్షల మేర పిజ్జాలు, 2.16 లక్షల బర్గర్లు డెలివరీ అయ్యాయి. క్విక్ కామర్స్ అంటే ఇప్పుడు కేవలం నిత్యావసరాలకే పరిమితం కాలేదు. ఒక యూజర్ ఏకంగా రూ. 6 లక్షల విలువైన బంగారు నాణేల్ని స్విగ్గీ ఇన్‌స్టామార్ట్‌లో కొనుగోలు చేశారు. ముంబైకి చెందిన ఒక వ్యక్తి.. తన ఆత్మీయులకు రూ. 1.45 లక్షల వాల్యూ చేసే బంగారు ఆభరణాల్ని గిఫ్ట్‌గా పంపించారు. ఇక బెంగళూరులో ఒక కస్టమర్ రూ. 1.8 లక్షల విలువైన రెండు ఐఫోన్స్ ఆర్డర్ చేశారు. మరికొన్ని క్రేజీ ఆర్డర్స్ చూస్తే.. బెంగళూరు నుంచి ఒక వ్యక్తి ఒకేసారి 100 బర్గర్స్ ఆర్డర్ చేశాడు. నాగ్‌పుర్ నుంచి మరో వ్యక్తి ఒక్కరోజులోనే ఏకంగా వేర్వేరు సమయాల్లో 93 సార్లు ఆర్డర్ చేశాడు. సూరత్ నుంచి మరో కస్టమర్ ఒకేరోజులో 22 వేర్వేరు రెస్టారెంట్స్ నుంచి ఆహారం తెప్పించుకున్నారు. పార్టీ సామగ్రిలో కేక్ ఆర్డర్స్ 7 రెట్లు, పార్టీ గ్లాసెస్ 2.5 రెట్లు ఎక్కువగా అమ్ముడయ్యాయి.