తెలంగాణ రాష్ట్రాన్ని గత మూడు వారాలుగా తీవ్రమైన చలిగాలులు జనజీవనాన్ని అస్తవ్యస్తం చేస్తోంది. వరుసగా 24వ రోజు కూడా చలి తీవ్రత ఏమాత్రం తగ్గకపోవడంతో రాష్ట్రవ్యాప్తంగా ప్రజలు గజగజలాడుతున్నారు. ముఖ్యంగా ఉత్తర తెలంగాణ జిల్లాలైన ఉమ్మడి ఆదిలాబాద్, మెదక్, కామారెడ్డి జిల్లాల్లో ఉష్ణోగ్రతలు కనిష్ట స్థాయికి పడిపోయి సింగిల్ డిజిట్‌కే పరిమితమయ్యాయి. ఆదిలాబాద్ జిల్లా తిర్యాణిలో అత్యల్పంగా 5 డిగ్రీల సెల్సియస్ ఉష్ణోగ్రత నమోదు కావడం పరిస్థితి తీవ్రతకు అద్దం పడుతోంది. ఈ నేపథ్యంలో వాతావరణ శాఖ ఆయా ప్రాంతాలకు 'ఆరెంజ్ అలర్ట్' జారీ చేస్తూ ప్రజలు అప్రమత్తంగా ఉండాలని హెచ్చరించింది.భాగ్యనగరంలో కూడా పెరిగింది. సాధారణంగా కాస్త వెచ్చగా ఉండే హైదరాబాద్ మున్సిపల్ కార్పొరేషన్ పరిధిలో ఉష్ణోగ్రతలు సింగిల్ డిజిట్‌కు పడిపోవడం గమనార్హం. శేరిలింగంపల్లిలోని హైదరాబాద్ కేంద్రీయ విశ్వవిద్యాలయం పరిసర ప్రాంతాల్లో 8.8 డిగ్రీల కనిష్ట ఉష్ణోగ్రత నమోదైంది. నగరంలోని ఇతర ప్రాంతాలైన రాజేంద్రనగర్ 10 డిగ్రీల సెల్సియస్, మౌలాలి 10.2 డిగ్రీల సెల్సియస్, గచ్చిబౌలి 10.9 డిగ్రీల సెల్సియస్ వంటి చోట్ల కూడా చలి గాలులు తీవ్రంగా ఉన్నాయి. తెల్లవారుజామున దట్టమైన పొగమంచు కురుస్తుండటంతో ఆఫీసులకు వెళ్లేవారు. పాఠశాల విద్యార్థులు, వీధి వ్యాపారులు తీవ్ర ఇబ్బందులు ఎదుర్కొంటున్నారు.వాతావరణ నిపుణుల విశ్లేషణ ప్రకారం, ఈ ఏడాది డిసెంబర్ నెలలో కనిష్ట ఉష్ణోగ్రతలు సాధారణం కంటే 3 నుంచి 4 డిగ్రీలు తక్కువగా నమోదవుతున్నాయి. దీనికి ప్రధానంగా మూడు కారణాలు కనిపిస్తున్నాయి. మేఘాలు లేకపోవడం వల్ల భూమి పగటిపూట గ్రహించిన వేడి రాత్రివేళ త్వరగా అంతరిక్షంలోకి వెళ్ళిపోతోంది. హిమాలయాల నుంచి వీస్తున్న పొడి, శీతల గాలులు నేరుగా తెలంగాణ మీదుగా ప్రవహిస్తున్నాయి. రాత్రి సమయాల్లో భూమి ఉపరితలం వేగంగా చల్లబడటం వల్ల కనిష్ట ఉష్ణోగ్రతలు పడిపోతున్నాయి.కొమురం భీమ్ ఆసిఫాబాద్ జిల్లా రాష్ట్రంలోనే అత్యంత శీతల ప్రాంతంగా నిలిచింది. ఇక్కడ 5.6 డిగ్రీల సెంటీగ్రేడ్ ఉష్ణోగ్రత నమోదైంది. గ్రామీణ ప్రాంతాల్లో ప్రజలు చలి నుంచి తట్టుకోవడానికి ఉదయం, రాత్రి సమయాల్లో చలిమంటలనే ఆశ్రయిస్తున్నారు. రాబోయే రెండు మూడు రోజుల పాటు ఇదే పరిస్థితి కొనసాగే అవకాశం ఉన్నందున.. వృద్ధులు, చిన్నపిల్లలు ఉదయం పూట బయటకు రాకపోవడమే మంచిదని వైద్యులు సూచిస్తున్నారు. శ్వాసకోశ సంబంధిత సమస్యలు ఉన్నవారు తగిన జాగ్రత్తలు తీసుకోవాలని వేడి ఆహారం, గోరువెచ్చని నీటిని తీసుకోవాలని నిపుణులు సలహా ఇస్తున్నారు.