Small Savings Schemes: పెట్టుబడులు పెట్టేందుకు మనకు చాలానే ఆప్షన్స్ ఉంటాయి. ఎలాంటి నష్ట భయం లేకుండా గ్యారెంటీ రిటర్న్స్ అందించే చిన్న మొత్తాల పొదుపు పథకాలకు మంచి గిరాకీ ఉంటుంది. వీటిల్లో నిర్దిష్ట పెట్టుబడిపై.. నిర్ణీత కాల పరిమితికి.. నిర్దిష్ట రాబడి అందుకోవచ్చు. వీటిల్లో సుకన్య సమృద్ధి యోజన, పబ్లిక్ ప్రావిడెంట్ ఫండ్, సీనియర్ సిటిజెన్ సేవింగ్స్ స్కీమ్ వంటివి అత్యంత ఆదరణ పొందిన స్కీమ్స్. ప్రతి 3 నెలలకు ఓసారి కేంద్ర ప్రభుత్వం స్మాల్ సేవింగ్స్ స్కీమ్స్ వడ్డీ రేట్లను సవరిస్తుంది. ఇప్పుడు 2026 జనవరి- మార్చి త్రైమాసికానికి కూడా కేంద్ర ఆర్థిక మంత్రిత్వ శాఖ కొత్త వడ్డీ రేట్లను ప్రకటించింది. వరుసగా 8వ త్రైమాసికంలోనూ కేంద్రం ఈ పథకాల వడ్డీ రేట్లను మార్చలేదు. దీంతో యథాతథంగానే కొనసాగనున్నాయి. అంటే పెట్టుబడులపై గతంలో వచ్చిన రాబడే అందనుంది. చివరిసారిగా కేంద్రం ఈ పథకాల వడ్డీ రేట్లను 2023-24 ఆర్థిక సంవత్సరం చివరి త్రైమాసికంలో పెంచేసింది. అప్పుడు సుకన్య సమృద్ధి సహా పోస్టాఫీస్ మూడేళ్ల టైమ్ డిపాజిట్ స్కీమ్ వడ్డీ రేట్లను పెంచగా.. అప్పటి నుంచి మరోసారి ఏ పథకం వడ్డీ రేటును కూడా పెంచలేదు. .. ఈ సారి వడ్డీ రేట్లు పెరుగుతాయని ఆశలు పెట్టుకుంటే.. కేంద్రం నిరాశే మిగిల్చింది. అయితే ఆర్బీఐ వడ్డీ రేట్లను వరుసగా తగ్గించి రెపో రేటును 5.25 శాతానికి చేర్చినప్పటికీ.. కేంద్రం ఈ పథకాల వడ్డీ రేట్లను మార్చలేదు. సాధారణంగా ఈ పథకాల వడ్డీ రేట్లు పదేళ్ల ప్రభుత్వ సెక్యూరిటీల రాబడి ఆధారంగా నిర్ణయిస్తారు. ఈ లెక్క ప్రకారం.. ఈసారి ఈ పథకాల వడ్డీ రేట్లను కేంద్రం తగ్గిస్తుందన్న అంచనాలు నెలకొన్నప్పటికీ.. అవే వడ్డీ రేట్లను కొనసాగిస్తూ నిర్ణయం తీసుకుంది. పీపీఎఫ్, సుకన్య సమృద్ధి వడ్డీ రేట్లు..>> ప్రస్తుతం 7.10 శాతంగానే ఉంది. కేవలం ఆడపిల్లలకు మాత్రమే అందుబాటులో ఉండే సుకన్య సమృద్ధి పథకం వడ్డీ రేట్లు 8.2 శాతంగా కొనసాగనున్నాయి. జనవరి- మార్చి క్వార్టర్‌కు సీనియర్ సిటిజెన్ సేవింగ్స్ స్కీమ్ వడ్డీ రేటు కూడా 8.2 శాతంగానే ఉంది. నేషనల్ సేవింగ్స్ సర్టిఫికెట్ వడ్డీ రేటు 7.7 శాతం, కిసాన్ వికాస్ పత్ర వడ్డీ రేటు 7.5 శాతంగా ఉంది. ఇక్కడ 115 నెలల్లో పెట్టుబడి రెట్టింపు అవుతుంది. . ఏడాది వ్యవధి టైమ్ డిపాజిట్ వడ్డీ రేటు 6.9 శాతంగా ఉండగా.. రెండేళ్లు, మూడేళ్లు, ఐదేళ్ల టైమ్ డిపాజిట్ వడ్డీ రేట్లు వరుసగా 7 శాతం, 7.10 శాతం, 7.5 శాతంగా ఉన్నాయి. ఐదేళ్ల రికరింగ్ డిపాజిట్ వడ్డీ రేట్లు 6.7 శాతంగా ఉన్నాయి. మంత్‌లీ ఇన్‌కం అకౌంట్ స్కీమ్ వడ్డీ రేటు 7.4 శాతంగా కొనసాగుతుంది. పీపీఎఫ్, సుకన్య సమృద్ధి పథకాల విషయానికి వస్తే ఇక్కడ వరుసగా 15 సంవత్సరాలు పెట్టుబడి పెట్టాల్సి ఉంటుంది. ఈ పథకాల్లో ట్రిపుల్ టాక్స్ బెనిఫిట్స్ ఉంటాయి. పెట్టుబడి సహా వడ్డీ రాబడి, మెచ్యూరిటీ రిటర్న్స్‌పై టాక్స్ ఉండదు. సుకన్య సమృద్ధి అకౌంట్.. పదేళ్లలోపు వయసున్న ఆడపిల్ల పేరిట తెరవాలి. ఆర్థిక సంవత్సరంలో కనీసం రూ. 250 పెట్టుబడితో చేరొచ్చు. గరిష్ఠ పెట్టుబడి పరిమితి రూ. 1.50 లక్షలు. పీపీఎఫ్ స్కీమ్‌లో కనీసం రూ. 500 తో చేరొచ్చు. ఇక్కడ కూడా గరిష్ఠ పెట్టుబడి పరిమితి రూ. 1.50 లక్షలు. వరుసగా 15 ఏళ్లు కట్టాలి.