న్యూజిలాండ్ స్టార్ ఆల్‌రౌండర్ గ్లెన్ ఫిలిప్స్ టోర్నీలో అభిమానులను ఆశ్చర్యానికి గురిచేశాడు. డిసెంబర్ 30న జరిగిన మ్యాచ్‌లో ఫిలిప్స్ అనూహ్యంగా రైట్ హ్యాండ్ నుంచి లెఫ్ట్ హ్యాండర్‌గా మారి బ్యాటింగ్ చేస్తూ భారీ షాట్లతో స్టేడియాన్ని ఊపేశాడు. ఈ అరుదైన ఘటనకు సంబంధించిన వీడియోలు సోషల్ మీడియాలో వేగంగా వైరల్ అవుతున్నాయి.సాధారణంగా పవర్ హిట్టర్‌గా పేరున్న ఫిలిప్స్, ఈ మ్యాచ్‌లో మాత్రం లెఫ్ట్ హ్యాండర్‌గా మారి కంట్రోల్‌తో కూడిన బ్యాటింగ్ చేశాడు. స్విచ్ హిట్స్‌తో పాటు, క్లాసిక్ డ్రైవ్స్ ఆడుతూ ఫీల్డ్ అంతా షాట్లు పంచాడు. స్టాన్స్ మార్చినా ఎలాంటి ఇబ్బంది లేకుండా బ్యాటింగ్ చేయడం చూసి అభిమానులు, క్రికెట్ నిపుణులు ఆశ్చర్యపోయారు. ఈ మ్యాచ్‌లో ఫిలిప్స్ అజేయంగా 90 పరుగులు చేసి ఓటాగో జట్టును 193/7 స్కోర్‌కు చేర్చాడు. లక్ష్య ఛేదనలో సెంట్రల్ డిస్ట్రిక్ట్స్ జట్టు 152/8కే పరిమితమైంది. దీంతో ఓటాగోకు సులభమైన విజయం దక్కింది.మ్యాచ్ అనంతరం ఫిలిప్స్ మాట్లాడుతూ “కొంతకాలంగా నెట్స్‌లో లెఫ్ట్ హ్యాండర్‌గా ప్రాక్టీస్ చేస్తున్నాను. కానీ ఇంతవరకు మ్యాచ్‌లో ఉపయోగించలేదు. ఇటీవల నెట్స్‌లో లెఫ్ట్ హ్యాండర్‌గా మరింత బాగా టైమింగ్ వస్తోంది. ఆ రోజు కోల్పోయేదేమీ లేదనిపించి, మ్యాచ్‌లో ట్రై చేశాను” అని చెప్పాడు.డేవిడ్ వార్నర్ వంటి ఆటగాళ్లు గతంలో స్టాన్స్ మార్చి బ్యాటింగ్ చేసినప్పటికీ, దేశీయ టోర్నీలో ఇంత ధైర్యంగా, నియంత్రణతో బ్యాటింగ్ చేయడం ఫిలిప్స్‌ను ప్రత్యేకంగా నిలబెట్టింది. ఇప్పటికే న్యూజిలాండ్ జట్టులో అత్యంత వర్సటైల్ ప్లేయర్‌గా గుర్తింపు పొందిన ఫిలిప్స్, ఈ ఇన్నింగ్స్‌తో తన బ్యాటింగ్‌కు మరో కొత్త కోణాన్ని జోడించాడు.ఇక ఐపీఎల్ విషయానికి వస్తే, గుజరాత్ టైటాన్స్ తరఫున ఆడుతున్నాడు. అయితే ఇప్పటివరకు అతడికి ఐపీఎల్‌లో పూర్తి స్థాయిలో అవకాశాలు దక్కలేదు. రెండు సీజన్లలో ఎనిమిది మ్యాచ్‌లు ఆడిన ఫిలిప్స్, మొత్తం 65 పరుగులు మాత్రమే చేశాడు. అయినప్పటికీ సూపర్ స్మాష్‌లో చేసిన ఈ ప్రదర్శనతో అతడి టాలెంట్‌పై మళ్లీ చర్చ మొదలైంది.