ఒక పాత్రను చూసి జనం పొగుడుతున్నారన్నా.. తిడుతున్నారన్నా.. ఆ పాత్ర జనంలోకి వెళ్లిపోయిందనే అర్థం. ఆ పాత్రలో వాళ్లు ఒదిగిపోయి అంతలా మెప్పిస్తున్నారని అర్థం. ఇప్పుడు సీరియల్‌లో నటిస్తున్న శ్రీవల్లి.. నటించడం కాదు.. జీవించేస్తుందంతే. ఆ సీరియల్‌లో కనిపించే వాళ్లంతా అందరూ అందరే. బుల్లితెర మెగాస్టార్ ప్రభాకర్, టాలీవుడ్ స్టార్ హీరోయిన్ ఆమని ఇద్దరి నటన గురించి చెప్పాల్సిన పనిలేదు. ఏ పాత్ర ఇచ్చినా కూడా పిండిఆరేస్తారంతే. ఇక ఇద్దరూ కలిసి జోడీ అంటే.. వాళ్లిద్దరి ముందు ఎవరు నటించిన కూడా తేలిపోతారంతే. అంత గొప్ప నటీనటులు వీళ్లు. అలాంటి వాళ్ల ముందు నటించాలంటే.. కత్తి మీద సామే. కానీ వాళ్ల ముందు కూడా వాళ్లతో సరిసమానంగా నటించడం కాదు.. కొన్ని సీన్లలో వాళ్లని కూడా డ్యామినేట్ చేసేస్తుందంటే.. శ్రీవల్లిని ఎక్స్‌ప్రెషన్స్ క్వీన్ అనకుండా ఎలా ఉండగలం. సాధారణంగా మన తెలుగు సీరియల్స్‌లో తెలుగు వాళ్లు కనిపించడం చాలా అరుదుగా మారింది. అంతా కన్నడ మేళం.. లేదంటే అరవ సంత. అంతా వాళ్లే.. పేరుకి మాత్రమే తెలుగు సీరియల్స్ కానీ.. నటించే వాళ్లంతా అక్కడ వాళ్లే. కానీ ఇల్లు ఇల్లాలు పిల్లలు సీరియల్‌లో చాలా వరకూ మన తెలుగు వాళ్లే కనిపిస్తుండటం శుభపరిణామం. వీళ్లలో రామరాజు పెద్ద కోడలుగా నటిస్తున్న శ్రీవల్లి మన తెలుగు అమ్మాయే. తన హావభావాలతో అద్భుతనటనతో మెప్పిస్తున్న ఈ బుల్లితెర భామ పేరు త్రివేణి యాదవ్ (). కట్టుబొట్టులో తెలుగింటి సాంప్రదాయం కొట్టొచ్చినట్టు కనిపించే త్రివేణి మన తెలుగు అమ్మాయిది గుంటూరు కాగా.. వైజాగ్‌లోని ఆంధ్రా యూనివర్సిటీలో ఉన్నత విద్యను అభ్యసించింది. నటి మాత్రమే కాదు.. మోడల్ కూడా. సినిమాలపై ఉన్న ఆసక్తితో ఇలా బుల్లితెర‌తో పాటు వెండితెరపైన మెరుస్తోంది. సీరియల్స్‌తో పాటు చాలా సినిమాల్లో కూడా నటించింది త్రివేణి. సప్తగిరి ఎల్ ఎల్ బీ, మిడిల్ క్లాస్ మెలోడీస్, క్రాక్, కేసీఆర్ బయోపిక్ తదితర చిత్రాల్లో నటించింది కానీ.. పెద్దగా గుర్తుండిపోయే పాత్రలైతే చేయలేకపోయింది. తెలుగు అమ్మాయి కదా.. సినిమాలో అంత గుర్తిండిపోయే పాత్రల్ని ఎక్కడిచ్చి చస్తారులే కానీ.. సినిమాల్లో అవకాశాలు లేకపోయినా కూడా కూడా.. తన టాలెంట్‌తో సీరియల్స్‌లో మెప్పిస్తోంది త్రివేణి. జీ తెలుగులో ముత్యాల ముగ్గు సీరియల్‌తో బుల్లితెరపై అడుగుపెట్టింది త్రివేణి. అనంతరం జెమిని టీవీలో సుందరి సీరియల్‌లో సుందరిగా మెయిల్ లీడ్ చేసింది. జెమినీ సీరియల్స్ అంటే అప్పట్లో పేరొచ్చేదేమో కానీ.. ఇప్పట్లో జెమినీ సీరియల్స్‌కి పెద్దగా వ్యూవర్ షిప్ లేదు కాబట్టి.. త్రివేణి ఎంత అద్భుతంగా నటించినా కూడా.. ఆమె నటన తెరమరుగైంది. ఆమెకి పెద్దగా పేరు తీసుకురాలేకపోయింది. కానీ స్టార్ మా ఛానల్‌లో ప్రసారం అవుతున్న ఇల్లు ఇల్లాలు పిల్లలు సీరియల్‌లో శ్రీవల్లిగా అద్దరగొట్టేస్తుంది. ముఖ్యంగా ఆమె హావభావాలు, స్లాంగ్ అయితే హైలైట్ అంతే. తన పాత్ర పండటం కోసం.. ఏం చేయడానికైనా సిద్దం అన్నట్టుగా ఏడుస్తూ.. నవ్వుతూ.. ఆడుతూ.. పాడుతూ.. సూపర్ పెర్ఫామర్ అనిపిస్తుంది శ్రీవల్లి అలియాస్ త్రివేణి. అసలు ఆమెది నెగిటివ్ రోల్ కావచ్చు గాక.. కానీ ఆమె స్క్రీన్‌పై కనిపిస్తే చాలు.. ఓ మెరుపు మెరిసినట్టే. ఇక కామెడీ టైమింగ్ అయితే... అలనాటి శ్రీలక్ష్మిని గుర్తు చేస్తుంది. తెలుగులో లేడీ కమెడియన్లల కొరతని తీర్చే మెటీరియల్ శ్రీవల్లి అనడంలో ఎలాంటి సందేహం లేదు. బుల్లితెరపై ఈ రేంజ్‌లో కామెడీ పండించిన మేటి నటి అంటే ఈమధ్య కాలంలో ఈమెనే. అంతలా నవ్విస్తుంది.. ఏడిపిస్తుంది.. జనాల్ని తిట్టుకునేట్టు చేస్తుంది శ్రీవల్లి (త్రివేణి). నిజానికి ఈ సీరియల్‌లో శ్రీవల్లి పాత్రను పోషిస్తున్న త్రివేణి యాదవ్‌ది మల్టీ షేడ్స్ ఉన్న రోల్. ఇందులో ఇమెది నెగిటివ్ రోల్ అయినా కూడా.. అందులో చాలా డెప్త్ ఉంటుంది. ఆమె ప్రతినాయికగా మారడానికి కూడా బలమైన కారణం ఉంటుంది. ఏదీ కూడా కావాలని చేయదు. తప్పనిసరి పరిస్థితుల్లో తల్లి మాట విని చేయకూడని తప్పులు చేస్తుంటుంది. క్లూప్తంగా ఆమె పాత్ర గురించి చెప్పాలంటే.. భాగ్యం, ఆనందరావుల పెద్ద కూతురు శ్రీవల్లి. తాను కటిక పేదరికంలో బండిపై ఇడ్లీలు అమ్మకుని బతుకున్నాం కాబట్టి.. తన కూతురికి అలాంటి పరిస్థితి రాకూడదని.. పెద్దింటి సంబంధం చేయాలనుకుంటుంది. అలా తాము కోటీశ్వరులం అని నమ్మించి.. రామరాజు పెద్ద కొడుకు చందుతో శ్రీవల్లిని ఇచ్చి పెళ్లి చేస్తుంది. తల్లి చేసిన అబద్దపు పెళ్లి వల్ల శ్రీవల్లి బతుకే అబద్దం అవుతుంది. ప్రతిరోజూ చస్తూ బతుకుతూ ఉంటుంది. చందుపై విపరీతమైన ప్రేమ ఉన్న శ్రీవల్లి తన కాపురాన్ని నిలబెట్టుకోవడం నానా తిప్పలు పడుతుంది. తోడికోడళ్లు ప్రేమ, నర్మదలకు చుక్కలు చూపిస్తూ.. తిప్పలు పడుతూ ఉంటుంది శ్రీవల్లి. ఈ తిప్పలే జనాల్ని నవ్విస్తాయి.. ఏడిపిస్తాయి.. తిట్టుకునేట్టు చేస్తాయి.. కొన్నిసార్లు అయ్యో పాపం అనేట్టు చేస్తున్నాయి.