: ఇటీవలి కాలంలో ఏఐ వినియోగం పెరిగిన సంగతి తెలిసిందే. చాలా కంపెనీలు కూడా తమ కార్యకలాపాల్లో ఏఐని భాగస్వామ్యం చేస్తున్నాయి. ఇదే సమయంలో ఆర్టిఫిషియెల్ ఇంటెలిజెన్స్ సంస్థలు.. ఏఐ టూల్స్ కూడా తీసుకొస్తున్నాయి. ఇక్కడ గూగుల్ జెమిని, మెటా ఏఐ, ట్విట్టర్ నుంచి గ్రోక్ ఏఐ, ఓపెన్ ఏఐ నుంచి చాట్‌జీపీటీ వంటి టూల్స్ అందుబాటులో ఉన్న సంగతి తెలిసిందే. భారత్‌లో జనాభాను దృష్టిలో పెట్టుకొని.. ఆయా సంస్థలు తమ టూల్స్‌పై ఇక్కడ కస్టమర్లను పెంచుకోవాలన్న ఉద్దేశంతో ఆఫర్లు ప్రకటిస్తున్నాయి. తొలుత ఉచితంగానే సేవలు అందించనున్నట్లు ప్రకటిస్తున్నాయి. . ఇదే సమయంలో భారతీ ఎయిర్‌టెల్.. పర్‌ప్లెక్సిటీ సేవల్ని ఫ్రీగానే అందిస్తుంది. ఇప్పుడు రిలయన్స్ జియో.. గూగుల్‌తో భాగస్వామ్యం ఏర్పరచుకొని.. దేశంలోని 48 కోట్ల మందికిపైగా జియో వినియోగదారులకు.. ఆర్టిఫిషియెల్ ఇంటెలిజెన్స్ సేవల్ని అందుబాటులోకి తెస్తోంది. రిలయన్స్ ఇండస్ట్రీస్ అనుబంధ సంస్థ.. రిలయన్స్ ఇంటెలిజెన్స్ లిమిటెడ్.. గూగుల్‌తో కలిసి తమ కస్టమర్లకు గూగుల్ జెమిని 2.5 ఏఐ ప్రో ప్లాన్‌ను ఫ్రీగా అందించనున్నట్లు ప్రకటించింది. ఫ్రీ యాక్సెస్ ఇక్కడ 18 నెలల పాటు అందనుంది. దీని విలువ సుమారు రూ. 35,100 గా ఉండటం విశేషం. అక్టోబర్ 30 నుంచి ఈ ప్లాన్ అందుబాటులోకి వస్తుంది. 18 నుంచి 25 ఏళ్ల వయసు వారికి ట్రూ అన్‌లిమిటెడ్ 5G ప్లాన్ రీఛార్జ్ చేసుకున్న జియో యూజర్లకు ఈ ప్లాన్ వర్తిస్తుంది. దశల వారీగా మిగతా యూజర్లకు ఇది అందుబాటులోకి వస్తుంది. జెమిని ఏఐ అనేది.. మల్టీమోడల్ ఏఐ మోడల్. ఇది టెక్ట్స్, ఇమేజెస్ వంటి వివిధ ఇన్‌పుట్స్‌ను అర్థం చేసుకుంటుంది. జెమిని ప్రో అనేది మరింత అధునాతన సబ్‌స్క్రిప్షన్ ప్లాన్. క్లౌడ్ స్టోరేజీ 2TB గా ఉంది. ఇక్కడ స్టడీ, రీసెర్చ్ కోసం నోట్‌బుక్ LM , జెమిని కోడ్ అసిస్ట్, జీ- మెయిల్, డాక్యుమెంట్స్ వంటి సేవలు ప్రత్యేకంగా ఉన్నాయి. ఈ ఆఫర్ పొందేందుకు Myjio యాప్ తెరవాలి. యాప్‌పై భాగంలో ప్రో ప్లాన్ ఆఫ్ గూగుల్ జెమిని ఫ్రీ అని బ్యానర్ కనిపిస్తుంది. ఫ్రీగా 18 నెలల జెమిని ప్రో ప్లాన్ పొందేందుకు.. క్లెయిమ్ నౌ బటన్ క్లిక్ చేసి రిజిస్టర్ చేసుకోవాలి. రిజిస్ట్రేషన్ పూర్తయ్యాక.. తదుపరి దశల కోసం.. కొద్ది రోజుల్లో మీకు అప్డేట్ వస్తుంది. పూర్తి వివరాల కోసం జియో వెబ్‌సైట్ సందర్శించాలి.