O pavillón da Cañota acollerá este sábado 1 de novembro a celebración da segunda edición do torneo Futuros Campións. O evento, promovido polo Team Thunder de Marín, reunirá ás novas promesas deste deporte procedentes de diferentes clubs de toda Galicia. O torneo contará cun total de 40 combates nas categorías Júnior, Mozo e Promesas. O obxectivo de Futuros Campións, segundo sinalan desde a organización, é ofrecer rodaxe e experiencia ás novas xeracións do boxeo autonómico, alternando os primeiros combates para debutantes coa preparación de boxeadores que pronto afrontarán os campionatos galegos. A cita desenvolverase en dúas sesións, unha matinal de 10:00 a 13:30 horas e outra de tarde de 15:30 a 21:00 horas. O prezo da entrada é de 10 euros, cantidade que irá destinada integramente a apoiar a organización do torneo e o traballo formativo que realiza o club marinense. "A primeira edición foi todo un éxito de participación e público, e as expectativas para esta segunda edición son igualmente altas", recoñecen no Team Thunder. "O obxectivo", destacan, "é seguir ofrecendo oportunidades de competición e formación dentro dunha contorna segura, educativo e apaixonante".