శర్వానంద్‌ హీరోగా నటిస్తున్న లేటెస్ట్ మూవీ ‘బైకర్‌’. అభిలాష్‌ రెడ్డి దర్శకత్వంలో ఈ స్పోర్ట్స్‌ డ్రామా తెరకెక్కుతోంది. యూవీ క్రియేషన్స్ బ్యానర్ లో రూపొందుతున్న ఈ చిత్రంలో మాళవికా నాయర్‌ హీరోయిన్ గా నటిస్తోంది. టైటిల్‌కి తగ్గట్టుగానే శర్వా ఇందులో బైక్‌ రైడర్ పాత్రలో కనిపించనున్నారు. చాలా రోజులుగా షూటింగ్ జరుపుకుంటున్న ఈ చిత్రాన్ని వచ్చే నెలలో థియేటర్లలోకి తీసుకురావడానికి మేకర్స్ రెడీ అయ్యారు. ప్రమోషన్స్ లో భాగంగా తాజాగా గ్లింప్స్‌ రిలీజ్ చేశారు. ఇటీవల దీపావళి పండగ సందర్భంగా ‘బైకర్‌’ ఫస్ట్ లుక్ లాంచ్ చేశారు. దీంట్లో శర్వానంద్ లుక్ అందరినీ ఆకట్టుకుంది. మొన్నటి వరకూ కాస్త బొద్దుగా కనిపించిన శర్వా.. ఒక్కసారిగా స్లిమ్ గా కనిపించి అందరికీ షాక్ ఇచ్చారు. బైక్‌ రైడర్‌ పాత్ర కోసం తనని తాను మార్చుకున్న విధానం చూసి ఆశ్చర్యపోయారు. లేటెస్టుగా వదిలిన గ్లింప్స్‌ ద్వారా సినిమా ఎలా ఉండబోతోంది శాంపిల్ గా చూపించారు. ఇందులో యాంగ్రీ మ్యాన్ రాజశేఖర్ నటిస్తున్నారనే విషయాన్ని రివీల్ చేసి సర్ప్రైజ్ చేశారు. ''ఇక్కడ ప్రతీ బైకర్ కి ఒక కథ ఉంటుంది. సమయంతో పోరాడే కథ.. చావుకు ఎదురెళ్ళే కథ.. ఏం జరిగినా పట్టువదలని మొండోళ్ల కథ'' అంటూ వచ్చిన ‘బైకర్‌’ గ్లింప్స్‌ ఇంట్రెస్టింగ్‌గా ఉంది. ''గెలవడం గొప్పకాదు.. చివరి దాకా పోరాడటం గొప్ప'' అంటూ స్పోర్ట్స్ మ్యాన్ స్పిరిట్ గురించి చెప్పారు. ఇప్పటిదాకా ఎక్కువగా యూత్ ఫుల్ మూవీస్, ఫ్యామిలీ స్టోరీలతో అలరించిన శర్వానంద్.. ఈసారి స్పోర్ట్స్ డ్రామాతో ఎంటర్టైన్ చేయడానికి వస్తున్నాడని ఈ వీడియోతో అందరికీ క్లారిటీ ఇచ్చారు. 'అఖండ 2'తో బాక్సాఫీస్ క్లాష్..‘బైకర్‌’ సినిమాని డిసెంబర్ 6వ తేదీన ప్రపంచ వ్యాప్తంగా విడుదల చేయనున్నట్లు మేకర్స్ ప్రకటించారు. అయితే డిసెంబర్ 5న 'అఖండ 2: తాండవం' చిత్రం రిలీజ్ కానుంది. , బోయపాటి శ్రీను కాంబోలో తెరకెక్కుతున్న పాన్ ఇండియా మూవీ ఇది. ఇప్పటికే రిలీజైన ప్రమోషనల్ కంటెంట్ కు మంచి రెస్పాన్స్ వచ్చింది. ఈసారి బాక్సాఫీస్ దగ్గర బాలయ్య తాండవం చేస్తారని అభిమానులు ధీమాగా ఉన్నారు. కానీ ఇప్పుడు పోటీగా ఒక రోజు ఆలస్యంగా శర్వానంద్ తన సినిమాని రిలీజ్ చేయనున్నట్లు ప్రకటించారు. మరోవైపు కార్తీ నటిస్తున్న 'వా వాతియార్' చిత్రాన్ని డిసెంబర్ 5న వరల్డ్ వైడ్ గ్రాండ్ థియేట్రికల్ రిలీజ్ చేయనున్నట్లు అనౌన్స్ చేశారు. దీన్ని బట్టి ఈసారి డిసెంబర్ ఫస్ట్ వీక్ లో మూడు సినిమాలు పోటీపడబోతున్నాయి. మరి వీటిల్లో ఏవేవి ఆడియన్స్ ని ఆకట్టుకుంటాయో చూడాలి.