ہریانہ کے سینئر آئی پی ایس افسر وائی پورن کمار کی خودکشی کے معاملہ پر کانگریس کے راجیہ سبھا رکن رندیپ سنگھ سرجیوالا نے ریاست کے وزیر اعلیٰ نائب سنگھ سینی پر طنزیہ حملہ بولا ہے۔ اتوار (12 اکتوبر) کو کیتھل میں واقع پریس کانفرنس میں رندیپ سرجیوالا نے الزام عائد کیا کہ ’’ہریانہ کے وزیر اعلیٰ نائب سنگھ سینی ملک کے قانون کو توڑ رہے ہیں اور قصورواروں کا ساتھ دے رہے ہیں۔‘‘Kaithal, Haryana: On Haryana IPS officer Y. Puran Kumar’s suicide case, Congress MP Randeep Singh Surjewala says, "...Nayab Singh Saini is subverting the laws of the country..." pic.twitter.com/fAbsEYcb58— IANS (@ians_india) October 12, 2025رندیپ سرجیوالا نے کہا کہ سینی کی قیادت میں ہریانہ میں 2 طرح کے قانون نافذ ہیں، ایک عام لوگوں کے لیے اور دوسرا ’نائب قانون‘۔ عام معاملوں میں پولیس بلا تاخیر ایف آئی آر کی بنیاد پر گرفتاری کرتی ہے، لیکن اس معاملے میں وزیر اعلیٰ پہلے تحقیقات پھر کارروائی کی بات کہہ کر قصورواروں کو بچانے کی کوشش کر رہے ہیں۔ ساتھ ہی انہوں نے سوال اٹھایا کہ اگر 6 ماہ تک تحقیقات مکمل نہیں ہوتی تو کیا انصاف کے لیے غیرمعینہ مدت تک انتظار کرنا ہوگا؟کانگریس راجیہ سبھا رکن نے حکومت سے سوال کیا کہ ’’اگر ہر مجرمانہ معاملہ میں پہلے تحقیقات مکمل ہونے کا انتظار کرنا ہو تو ملک میں پولیس فوری طور پر گرفتاری کیوں کرتی ہے؟‘‘ ساتھ ہی انہوں نے کہا کہ یہ معاملہ صرف ایک آفیسر کی خودکشی کا نہیں ہے، بلکہ یہ غریب اور دلت سماج کے انصاف کے حق کا سوال ہے۔ کانگریس پارٹی اس معاملے میں پورن کمار کی اہلیہ آئی اے ایس آفیسر امنیت پی کمار اور پورے دلت سماج کے ساتھ کھڑی ہے، جو قصورواروں کی فوری گرفتاری اور سخت کارروائی کا مطالبہ کر رہی ہے۔کانگریس لیڈر نے نائب سینی پر قصورواروں کی حمایت کا الزام عائد کرتے ہوئے کہا کہ ’’یا تو نائب سینی نے نیا ’نائب طریقہ‘ اور ’نائب قانون‘ تلاش لیا ہے، یا پھر وہ براہ راست قصورواروں کے ساتھ کھڑے ہیں۔‘‘ انہوں نے یہ بھی کہا کہ اگر ایک سینئر پولیس آفیسر کی خودکشی کے معاملے میں بھی ’نائب قانون‘ نافذ ہوگا تو عام آدمی خاص طور سے غریب اور دلت کو انصاف کیسے ملے گا؟ رندیپ سرجیوالا نے سوال اٹھایا کہ کیا ہریانہ میں غریب اور دلت ہونا جرم بن گیا ہے؟ انہوں نے مطالبہ کیا کہ اس معاملے میں فوری طور پر کاررائی ہو اور قصورواروں کو گرفتار کیا جائے۔ کانگریس لیڈر نے زور دے کر کہا کہ پارٹی اس معاملہ کو اس وقت تک اٹھاتی رہے گی جب تک پورن کمار کے اہل خانہ اور دلت سماج کو انصاف نہیں مل جاتا۔