غزہ/یروشلم: اسرائیل اور حماس کے درمیان قیدیوں کا تبادلہ کچھ دیر بعد متوقع ہے، ریڈ کراس کی گاڑیاں غزہ کے علاقے دیرالبلح پہنچ گئی ہیں۔تفصیلات کے مطابق اسرائیل اور حماس کے درمیان قیدیوں کے تبادلے کا عمل آج کسی بھی وقت شروع ہونے کا امکان ہے۔عرب میڈیا نے بتایا ریڈ کراس کی گاڑیاں غزہ کے علاقے دیرالبلح پہنچ گئی ہیں اور رہائی کے انتظامات مکمل کر لیے گئے ہیں۔عرب میڈیا کے مطابق، فلسطینی قیدیوں کو اسرائیلی جیلوں سے بسوں کے ذریعے مخصوص مقامات پر منتقل کیا جا رہا ہے۔ معاہدے کے تحت 20 اسرائیلی یرغمالیوں کے بدلے 2 ہزار فلسطینی قیدیوں کو رہا کیا جائے گا۔حماس کے مسلح ونگ القسام بریگیڈ نے 20 اسرائیلی یرغمالیوں کی فہرست جاری کر دی ہے۔اسرائیلی حکام کا کہنا تھا کہ جیسے ہی یرغمالیوں کی رہائی عمل میں آئے گی، اسی وقت فلسطینی قیدیوں کو بھی رہا کر دیا جائے گا۔ذرائع کے مطابق یہ تبادلہ شرم الشیخ میں طے پانے والے غزہ امن معاہدے کے ابتدائی مرحلے کا حصہ ہے، جس کا مقصد خطے میں کشیدگی کم کرنا اور انسانی بحران کو ختم کرنا ہے۔بین الاقوامی ریڈ کراس رہائی کے عمل کی نگرانی کرے گا تاکہ فریقین کے درمیان معاہدے پر مکمل طور پر عملدرآمد یقینی بنایا جا سکے۔