Flight Ticket: విమాన ప్రయాణికులకు బిగ్ అప్డేట్. విమాన టికెట్ల బుకింగ్, క్యాన్సిల్, రీఫండ్లకు సంబంధించి డైరెక్టరేట్ జనరల్ ఆఫ్ సివిల్ ఏవియేషన్ (DGCA) పలు చర్యలను ప్రతిపాదించింది. ఫ్లైట్ టికెట్ బుక్ చేసుకున్న 48 గంటల లోపు ఎలాంటి అదనపు ఛార్జీలు లేకుండా రద్దు చేసుకునేందుకు లేదా మార్పులు చేసుకునేందుకు వీలు కల్పించాలని ప్రతిపాదించింది. ఇందుకోసం లుక్ ఇన్ విండో తీసుకురావాలని తెలిపింది. తాజా ప్రతిపాదనల్లో ఇది అత్యంత ముఖ్యమైనదిగా చెప్పవచ్చు. ఆ స్పందనలను బట్టి తుది విధానాన్ని ప్రకటించనుంది. ప్రయాణాన్ని రద్దు చేసుకున్నప్పుడు, ప్రయాణం రద్దైనప్పుడు టికెట్ డబ్బులు రీఫండ్‌కు నిర్దేశిత సమయం, క్యాన్సిల్ చేసుకున్న టికెట్లపై ఎయిర్ లైన్స్ సంస్థలు వసూలు చేసే ఛార్జీలకు పరిమితి, రీపండ్ విధానాల్లో మరింత పారదర్శకతను తీసుకురావడమే లక్ష్యంగా డీజీసీఏ ఈ ప్రతిపాదనలు చేసినట్లు సంబంధిత వర్గాలు తెలిపాయి. టికెట్ బుక్ చేసిన 48 గంటల పాటు లుక్ ఇన్ ఆప్షన్ అందించాలి. ఈ సమయంలో ప్రయాణికులు ఎలాంటి అదనపు ఛార్జీలు లేకుండా టికెట్ రద్దు లేదా మార్పు చేసుకోవచ్చని డీజీసీఏ తెలిపింది. అయితే, కొత్త తేదీలో ఉన్న టికెట్ ధరలో మార్పులు ఉన్నట్లయితే దానికి సంబంధించిన చెల్లింపులు చేయాల్సి ఉంటుంది. ఇంటర్నేషనల్ విమానాల్లో ప్రయాణానికి 15 రోజుల్లోపు ఈ లుక్ ఇన్ విండో సౌకర్యం ఉంటుంది. ఫ్లైట్ టికెట్ బుక్ చేసుకున్న 48 గంటల తర్వాత ప్రయాణాన్ని రద్దు చేసుకోవాలనుకున్నట్లయితే క్యాన్సిల్ ఛార్జీలను ప్రయాణికులు చెల్లించాలి. టికెట్ బుకింగ్ చేసుకున్న 24 గంటల లోపు ప్రయాణికుల పేరులో తప్పులు గుర్తించి మార్పులు చేయాలనుకుంటే ఏ ఛార్జీలను వసూలు చేయకూడదు. క్రెడిట్ కార్డుతో టికెట్ బుక్ చేసుకుని రద్దు చేసుకుంటే 7 రోజుల్లోగా రీఫండ్ మొత్తం క్రెడిట్ కార్డుదారుడి అకౌంట్లో జమ చేయాలి. నగదు ట్రాన్సాక్షన్లు అయితే కంపెనీ ఆఫీసు లేదా టికెట్ కొనుగోలు చేసిన దగ్గర వెంటనే రీఫండ్ చేయాలి. ట్రావెల్ ఏజెంట్ లేదా పోర్టల్ ద్వారా ఫ్లైట్ టికెట్ కొనుగోలు చేసినట్లయితే రీఫండ్ ప్రక్రియను విమానయాన కంపెనీలు 21 పని దినాల్లోగా పూర్తి చేయాల్సి ఉంటుంది. టికెట్ రద్దు లేదా వినియోగించి పక్షంలో యూడీఎఫ్, ఏడీఎఫ్ లేదా పీఎస్ఎఫ్ వంటి ట్యాక్సులు, ఫీజులను పూర్తిగా తిరిగి ఇవ్వాలి. టికెట్ బుకింగ్ టైంలో క్యాన్సిలే,న్ ఛార్జీలను స్పష్టంగా చెప్పాలి. బేసిక్ ఛార్జీలు, ఇంధన సర్ ఛార్జీ కంటే అధికంగా క్యాన్సిలేషన్ ఛార్జీలను వసూలు చేయకూడదు. రీఫండ్ ప్రాసెస్ చేసేందుకు ఎలాంటి అదనపు ఛార్జీలు విధించకూడదు. భారత రీఫండ్ రూల్స్ పాటిస్తూనే సొంత దేశంలో రీఫండ్ రూల్స్‌ను విదేశీ విమాన సంస్థలు అమలు చేయాలి. వైద్య అత్యవసర పరిస్థితుల కారణంగా ప్రయాణికులు టికెట్ రద్దు చేసుకున్నట్లయితే రీఫండ్ లేదా క్రెడిట్ షెల్‌ను అందించాలి.