بیجنگ(9 نومبر 2025): چین نے امریکا کو نایاب معدنیات کی برآمد پرعائد پابندی ہٹا دی، یہ معطلی آج سے مؤثر ہوگی اور ایک سال تک برقرار رہے گی۔غیر ملکی میڈیا رپورٹ کے مطابق چین نے امریکا کے ساتھ جاری تجارتی تنازعات کے تناظر میں نایاب معدنیات کی برآمد پر عائد پابندیوں میں نرمی کا اعلان کیا ہے۔یہ اقدام 7 نومبر 2025 کو چین کے وزارت تجارت کی جانب سے جاری کیا گیا، جس کے تحت نایاب معدنیات سمیت دیگر اہم معدنیات کی برآمد کے لیے عام اجازت نامے جاری کیے جائیں گے۔رپورٹ کے مطابق یہ پابندیوں میں جزوی نرمی ہے، جو امریکا اور چین کے درمیان حالیہ تجارتی معاہدوں کا نتیجہ ہے، لیکن تمام پابندیاں مکمل طور پر ختم نہیں ہوئیں۔پہلے مرحلے میں گیلئم، جرمانیم، اینٹمونی اور سپر ہارڈ میٹریلز سے متعلق دوہرے استعمال کی اشیاء کی برآمد پر عائد پابندی کو معطل کر دیا، چینی وزارتِ تجارت کے مطابق یہ معطلی آج سے مؤثر ہوگی اور ایک سال تک برقرار رہے گی۔ماہرین کا کہنا ہے کہ چین کا یہ اقدام بیجنگ اور واشنگٹن کے درمیان جاری اقتصادی کشیدگی میں ایک نیا موڑ ثابت ہو سکتا ہے، خصوصاً ایسے وقت میں جب عالمی منڈی نایاب دھاتوں اور بیٹریوں کے مواد پر انحصار کے باعث غیر یقینی کیفیت کا شکار ہے۔