A afección do Pontevedra tardará en esquecer un partido como o vivido este sábado en Pasarón fronte ao Mérida. No enfrontamento houbo de todo, pero o que sen dúbida quedará na memoria serán os dous penaltis fallados por Selma en tan só dous minutos e que privaron ao equipo de volver sumar os tres puntos. Compa adiantou os granates no primeiro tempo, Javi Domínguez fixo o empate no segundo e Selma errou os dous penaltis que puideron dar a vitoria ao equipo lerezano cando estaba a xogar cun home máis. Ademais diso, a tarde tamén a embazou a lesión de Juanra, que tivo que ser retirado en padiola. Foi o Pontevedra no que empezou mandando sobre o terreo de xogo, facéndose coa posesión e gozando do primeiro achegamento a portaría rival. Era o minuto cinco de xogo e Álex González recibiu en banda dereita, recortou ao seu par e xutou desde fóra da área, pero o seu disparo foise demasiado alto. A resposta do Mérida chegou pouco despois tras un saque de banda no seu propio campo, Doncel recibiu, entrou só até o bordo da área e tentou sorprender a Marqueta, que estaba un pouco adiantado. O que estivo máis cerca do tanto foi Compa ao once minutos ao recibir un pase filtrado de Resende, pero se escoró demasiado e Adrián evitou o 1-0. Tras esa acción o ritmo de xogo viuse freado e as defensas impuxéronse aos ataques, conseguindo manter o balón afastado de senllas portarías. Así ocorreu ata que se alcanzou a media hora de xogo, instante no que se produciu o primeiro punto de inflexión do encontro. Primeiro avisou o ex granate Chiqui, topándose con Garay, e despois respondeu o Pontevedra, atopándose co premio. Álex González recibiu na dereita, desfíxose do seu par e deulla a Garay, pero o seu disparo desviouno un defensor a córner. Nese saque de esquina, Yelko puxo o balón con música ao momento de penalti, onde Compa apareceu completamente só para cabecear a gol. Puido o Pontevedra facer os segundo minutos despois aproveitando que os xogadores do Mérida estaban estáticos. Montoro cedeu a Compa, Compa a Álex e este a Brais, entrando na área seguida por dous defensas e acompañado por un Resende que entraba completamente só. Abelenda non o viu, fíxoselle tarde e un defensor desviou a córner. Nesa acción Yelko colgou o esférico na área, Resende rematou de cabeza e Adrián parou o intento do 2-0. Rubén pediu revisión por posible agarrón na área, pero o colexiado non o concedeu. Na portaría contraria, mentres tanto, ocorría máis do mesmo tras un córner, pedindo Fran Ruiz revisión por outro posible agarrón que o árbitro tampouco deu. Xa no desconto, unha falta botada por Chiqui finalizouna Doncel ao corpo de Marqueta, evitando así o empate. Tras o paso polos vestiarios, o Pontevedra buscou o tanto que dese certa tranquilidade e puido atopalo por medio de Brais nada máis regresar ao terreo de xogo. Álex pelexou un balón que parecía perdido, rouboullo ao lateral rival e penetrouse na área para ceder a Abelenda, que disparou alto. Cinco minutos despois chegaron os problemas para os granates en forma de lesión. Juanra quedou cravado mentres defendía a un rival e tívose que retirar en padiola. Pasada esa acción, o Mérida deu un paso adiante e non tardou en atopar o gol do empate. Chiqui colgou unha falta desde tres cuartos de campo e Javi Domínguez, ao primeiro toque, fixo o 1-1. Rubén Domínguez axitou entón o banco cun triplo cambio e moveu a Álex á banda esquerda, xerando entón por este lateral a maior parte das ocasións do equipo. A primeira guisouna e comeuna el só, regateando a todo o que se puña por diante para sacar un potente disparo que Adrián desviou a córner. E no minuto 78 chegou a polémica. Miguel Cuesta roubou o balón no seu propio campo e deulla a Álex, índose en velocidade para ceder a Selma, que foi derrubado por un Evdald dentro da área. O colexiado non dubidou en sinalar penalti e expulsar ao xogador visitante. Selma xutou, Adrián adiviñoulle a traxectoria e Álex González cazou o rexeite, disparando sen dubidar entre o tres paus. Un defensor tirouse para tapar o tiro, pero o balón deulle na man, castigándose esa acción con outro lanzamento desde o once metros a favor do Pontevedra. De novo Selma disparou e esta vez o balón estrelouse no traveseiro, fallando o seu terceiro penalti no que vai de tempada. O árbitro engadiu 16 minutos de desconto nos que os granates trataron de aproveitar a superioridade numérica para castigar ao seu rival, pero por máis que o tentaron terminaron morrendo na beira. PONTEVEDRA CF (1): Marqueta, Álex González, Brais Abelenda, Yelko (Eimil, min. 69), Miguel Cuesta, Resende (Selma, min. 69), Juanra (Alain, min. 51), Vidorreta, Garay (Luisao, min. 96), Compa (Tiago, min. 69) e Montoro. AD MÉRIDA (1): Adrián, Parella (Pipe, min. 92), Javi Domínguez, Chiqui (Areso, min. 92), Martín, Álvaro, Doncel (Artola, min. 92), Gaizka (Rui, min. 59), Benny (Beneit, min. 46), Jacobo e Evdald. Árbitro: David López (Cataluña), auxiliado en bandas por Max Van Esso e Víctor Jiménez. Amoestou a Yelko (23'), Brais (45'), Alain (83') no Pontevedra e a Doncel (4'), Evdald (14') no Mérida. Expulsou ao xogador do Mérida Evdald no minuto 82. Goles: 1-0, Compa, min. 33. 1-1, Javi Domínguez, min. 67. Incidencias: Partido da xornada 12 de liga no Grupo I de Primeira RFEF disputado no Estadio Municipal de Pasarón ante 2.416 espectadores. [galleries:vertical:10857]