O Bloque Nacionalista Galego (BNG) advertiu este mércores sobre as consecuencias do proxecto eólico Greco, promovido pola empresa Mowe Energía IVm, pertencente ao grupo Villar Mir, e que afecta concellos como Cerdedo-Cotobade, A Lama e Fornelos. Nunha rolda de prensa encabezada polo deputado autonómico Luís Bará, acompañado da senadora Carme da Silva e dos portavoces municipais como Ernesto Filgueira e comarcais, a formación denunciou as dimensións do proxecto, cualificándoo de "megaeólico" e "auténtica barbaridade" polo seu impacto ambiental, paisaxístico e social. Segundo Bará, o proxecto prevé 109 megavatios de potencia distribuídos en dúas zonas: Greco Norte (en Cerdedo-Cotobade, con 21 aeroxeradores e un de reserva) e Greco Centro (con 7 aeroxeradores e dous de reserva), xunto cunha liña de alta tensión de 30 km que atravesaría a Serra do Suído ata Beariz. O deputado subliñou que existen informes previos desfavorables emitidos pola Xunta para proxectos similares na zona e que a acumulación de parques eólicos na contorna, con arredor de 700 aeroxeradores proxectados ou en tramitación, crea unha barreira para aves e morcegos, ademais dun colapso ambiental nunha zona de 25 quilómetros con 17 parques eólicos e outros 20 autorizados para a súa construción. O BNG denuncia tamén que a Xunta puxo en marcha a tramitación do proxecto Greco en agosto de 2025 ao consideralo de incidencia supramunicipal, aplicando unha modificación legal, que prioriza os intereses dos proxectos eólicos sobre a protección paisaxística. Bará acusou o executivo galego de "caciquismo" e advertiu dunha "presunta prevaricación" ao modificar a normativa para sortear informes desfavorables, desprotexendo espazos de alto valor paisaxístico como a mesma Serra do Suído. O BNG anunciou unha campaña de información social, a presentación de alegacións colectivas durante o mes de prazo aberto no Boletín da Provincia, e accións institucionais, incluídas mocións nos concellos afectados, no Parlamento Galego, Congreso e Senado. Carme da Silva, senadora do BNG, advertiu que Galicia está a converterse nun "terreiro de sacrificio" enerxético e reclamou no Senado información detallada sobre o impacto destes proxectos. Segundo a formación, Galicia padece un "espolio" porque non recibe contraprestacións reais desta produción masiva de enerxía eólica, e esixe que non se dean pasos sen unha planificación axeitada que reverta en beneficio do territorio e da súa industrialización. Carme da Silva e Luís Bará observan documentos sobre o proxecto eólicoPontevedraViva O BNG pide finalmente unha resposta institucional e social para evitar, nas palabras de Bará, "a maior agresión ambiental e social da historia recente da comarca". Bará tamén demandou a Alfonso Rueda, presidente da Xunta de Galicia, o respecto absoluto ás decisións xudiciais que están a paralizar proxectos eólicos polo risco de danos irreversibles ao medio.