Bocanada de aire e tranquilidade para o Club de Cisne Balonmán, que asenta na zona media da División de Honra Prata co triunfo conseguido este sábado na pista do Balonmano Base Oviedo (27-32). É o cuarto triunfo do curso dos pontevedreses, que se van aos 8 puntos, sen acusar o esforzo do partido de Copa do Rei do mércores e no que rozou a sorpresa. Nesta ocasión os de Quiños dominaron desde o principio, co gol inicial de Yago López, e nunca estiveron por baixo no marcador. O 1-5 de saída que marcaron fixo ao Oviedo pedir tempo morto, e o certo é que os locais melloraron para devolver as táboas no marcador no ecuador do primeiro tempo (11-11). Nese momento volveu subir a eficacia o Cisne, comandado en ataque por un Joao Ferreira estelar (12 tantos), para marchar ao descanso de novo cunha importante vantaxe (13-19). Partido entre Oviedo Base e CisneClub Cisne Balonmán Non caeron na mesma pedra os pontevedreses na segunda metade, controlando o xogo co marcador a favor e sen grandes sustos. De feito os locais chegáronse a achegar a catro goles (19-23), pero tres tantos seguidos acabaron con calquera simulacro de reacción asturiana. Con este resultado o Cisne ascende até a décima posición da clasificación.