తల్లిదండ్రులు ఏం చెప్పినా పిల్లల మంచికోసమే. కానీ తల్లిదండ్రులు అనుభవంతో చెప్పిన మాటలు వినకుండా.. తప్పటడుగులు వేసిన వారు చాలా మంది ఉన్నారు. చివరికి తాము తప్పు చేశామని గ్రహించే సమయానికి.. జీవితమే వారి చేతుల్లో లేకుండా పోతుంది. అచ్చం ఇలాంటి పరిస్థితే ఓ యువతికి వచ్చింది. తల్లిదండ్రులు చెప్పిన మాటలను చాదస్తంగా భావించింది. స్వేచ్ఛగా, స్వతంత్రంగా జీవించాలనే భావనలు ఎక్కువ. తన స్వేచ్ఛను వెతుక్కునే క్రమంలో ప్రేమ పేరుతో ఇద్దరి చేతిలో మోసపోయింది. ప్రేమించినట్లు నమ్మించినోడే.. బలవంతంగా వ్యభిచారంలోకి దించాడు. ఒళ్లు హూనమైపోతుంది అని వేడుకున్నా కనికరించని పరిస్థితుల్లో.. నిస్సహాయ స్థితిలో అయినవాళ్లను కాపాడమని కోరింది. ఈ తరం యువత తెలుసుకోవాల్సిన ఓ యువతి కన్నీటి కథ. యువతి జీవితంలోకి రాక్షసుడు..ఇప్పటివరకు మనం చెప్పుకున్న యువతి సహజ (పేరు మార్చాం).. విజయనగరం ప్రాంతానికి చెందింది. చిన్నప్పటి నుంచి స్వేచ్ఛగా జీవించాలనే తపన.. సహజను తన సొంత దారులు వెతుక్కునేలా చేసింది. అలా 2016లో గాజువాకకు చెందిన ఓ యువకుడితో పరిచయం ఏర్పడింది. అది ప్రేమగా పరిణమించి.. పెళ్లి పీటల వరకు వెళ్లింది. ఇద్దరూ ఓ శుభముహుర్తాన.. వివాహ బంధంలోకి అడుగుపెట్టారు. పెళ్లైన కొత్తలో కొంత కాలం దంపతులిద్దరూ అన్యోన్యంగానే ఉన్నారు. ఈ క్రమంలో ఓ పాప పుట్టింది. ఆ తర్వాత ఇద్దరి మధ్య మనస్పర్థలు ఏర్పడి విడిపోయారు. అనంతరం సహజ తన బిడ్డను తీసుకుని విజయవాడ వెళ్లి.. అక్కడ ఓ మెడికల్‌ సంస్థలో ఉద్యోగానికి కుదిరింది. ఇలా కాలం గడిచిపోతున్న తరుణంలో ఆమె జీవితంలోకి ఓ రాక్షసుడు ఎంటర్ అయ్యాడు.సొంత బిడ్డలా చూసుకుంటానని..సహజ.. విజయవాడలో ఉద్యోగం చేస్తున్న క్రమంలో.. విజయనగరం ప్రాంతానికి చెందిన ఓ యువకుడు సోషల్ మీడియాలో పరిచయం అయ్యాడు. ఒకరి గురించి ఒకరు అన్ని విషయాలూ తెలుసుకున్నారు. సహజ పాస్ట్ గురించి తెలుసుకున్న ఆ యువకుడు.. ఆమెకు కొత్త జీవితాన్ని ఇస్తానన్నాడు. పాపను తన సొంత బిడ్డగా చూసుకుంటానని నమ్మించాడు. తనకు, తన కుమార్తెకు కొత్త జీవితం దొరుకుతుందన్న ఆశతో.. అతడి మాటలు విని దగ్గరైంది సహజ. ఇలా కొన్నాళ్లు సోషల్ మీడియా సావాసం తర్వాత.. విశాఖపట్నంలో కాపురం పెట్టారు. ఈ క్రమంలోనే అతడిలో రాక్షస ప్రవృత్తి బయటకొచ్చింది. వ్యభిచారంలోకి దింపి..సహజను ఆ రాక్షసుడు. ఇలా సంపాదించిన డబ్బులతో కారు, ఖరీదైన వస్తువులు కొనేవాడు. రోజులు గడుస్తున్నా కొద్దీ.. సహజ శరీరకంగా, మానసికంగా కుంగిపోయింది. ఒళ్లు హూనమవుతోందని.. ఇది ఆపేయాలని ప్రాధేయపడింది. ఇది కాకుండా కిరాణా దుకాణం వంటిది ఏదైనా స్వయం ఉపాధి చూసుకుని.. గౌరవంగా బతుకుదామని వేడుకుంది. అయినా ఆ రాక్షసుడిలో మార్పు రాలేదు. అంతేకాకుండా సొంత బిడ్డలా చూసుకుంటానన్న సహజ కుమార్తెతో కూడా.. వ్యాపారం చేస్తానని ఆమెను బెదిరించాడు. అతడి మాటలకు గుండె పగిలిన సహజ.. నిస్సహాయ స్థితిలో కన్నీరుమున్నీరైంది. రాక్షసుడి చేతిలో ఛిద్రమైన బతుకును తలచుకుని, తల్లిదండ్రుల మాట వినకుండా తాను వేసిన తప్పటడుగులు గుర్తు తెచ్చుకుని సహజ కుమిలిపోయింది. ఈ క్రమంలో తనకు అయినవాళ్లే గతి అని.. విజయనగరంలో ఉంటున్న తన సోదరికి జరిగిన విషయం అంతా చెప్పింది. మీ మాట వినకుండా అజ్ఞానం, తలపొగరుతో తప్పటడుగు వేశానని విలపించింది. ఇప్పుడు తన జీవితం ఎలాగో సర్వనాశనం అయిపోయింది.. కానీ తన కుమార్తెను అయినా కాపాడాలని కన్నీళ్లతో ప్రాధేయపడింది. పట్టింపులకు పోకుండా.. రక్త సంబంధం తామున్నామంటూ ధైర్యం చెప్పింది. కుటుంబ సభ్యుల సాయంతో ఆమె సోదరి.. తల్లీబిడ్డను విజయనగరం తీసుకువచ్చింది. విజయనగరంలో పోలీసులకు సహజ ఫిర్యాదు చేసినా.. విశాఖపట్నంలో ఘటన జరిగింది కాబట్టి అక్కడికి వెళ్లాలని తిప్పిపంపించారు. ఈ క్రమంలో ఆ రాక్షసుడికి విషయం తెలిసి రూ. 3 లక్షలిచ్చి చేతులు దులిపేసుకోవాలనుకున్నాడు. దీనికి సహజ అంగీకరించలేదు. ఈ ఘటనపై ఇప్పటివరకు పోలీసులు కేసు నమోదు చేయలేదు. అయితే, స్వేచ్ఛగా బతకాలనుకోవడంలో తప్పులేకపోయినా.. అనాలోచితంగా అడుగులు వేయడం వల్ల సహజ ఇలాంటి ఇబ్బందులు ఎదుర్కోవాల్సి వచ్చింది.