O Centro Asociado da UNED en Pontevedra celebrará o mércores 19 de novembro un curso titulado "Redes de comunicación neuroendocrina e a súa influencia na saúde psicofísica: nervio vago, eixo hipotalámico-hipofisario-adrenal e eixo intestino-cerebro". A formación, que poderá seguirse tanto de maneira presencial como online, está dirixida a estudantes, profesionais sanitarios e persoas interesadas no vínculo entre os sistemas nervioso e endocrino e o seu efecto na saúde física e emocional. Segundo os estudos, estes sistemas son fundamentais para a regulación do organismo e o equilibrio psicofísico, e o seu coñecemento resulta clave para entender como as emocións, a tensión e a alimentación inflúen na saúde xeral. O programa, coordinado por Rafael Cotelo Pazos e coa participación das psicólogas Ana Paula Ferreira Simões e Anaís Sueiro Ferreira, terá lugar entre as 16:00 e as 20:30 horas. Durante a xornada analizaranse os principais mecanismos de comunicación entre sistema nervioso central, sistema endocrino e aparello dixestivo, así como ferramentas prácticas para mellorar o equilibrio psicofísico e benestar xeral. A matrícula ten un custo único de 10 euros e quen acrediten polo menos o 85 % de asistencia recibirán un certificado expedido pola UNED.