Primeiros pasos en Pontevedra do novo Instituto de Investigación en Ciencias do Deporte (Cidega). Nace co obxectivo de converterse nunha plataforma de referencia para a promoción e o desenvolvemento do coñecemento científico no ámbito do exercicio físico, a saúde, o rendemento deportivo e a educación física. Este ente impulsado no campus universitario pontevedrés iniciou a súa actividade coa constitución da súa xunta directiva e o nomeamento do catedrático Carlos Lago como director comisario. Con sede na Facultade de Ciencias da Educación e do Deporte, Cidega é o quinto instituto de investigación da Universidade de Vigo, Inicia a súa actividade con doce investigadores e investigadoras promotores, pero coa intención de "crecer rápido" con "outros investigadores de Galicia, do resto de España e doutras partes do mundo", explica Carlos Lago. Este instituto créase como "un paraugas" que permita coordinar o traballo dos diferentes grupos de investigación vinculados coas ciencias do deporte. "Vainos a permitir ser máis competitivos e crecer baixo unha estratexia común" coa meta de "contribuír de maneira multidimensional aos retos da práctica de actividades físico-deportivas na sociedade actual", defende o seu novo director. Na reunión celebrada este luns, presidida polo reitor Manuel Reigosa, aprobouse a constitución dunha xunta directiva integrada polo propio reitor; o director Carlos Lago; Marián Fernández Villarino como secretaria comisaria; Alba Cuba en representación dos investigadores vinculados; ou Luís Pita como persoal non investigador vinculado. Un representante do Consello Social da Universidade e outro dunha institución pública ou privada que contribúa ao financiamento ou actividade do Cidega aínda pendentes de nomeamento completarán esta xunta directiva. Tamén se aprobou a composición dun comité asesor, integrado por seis catedráticos, ao que se sumará unha comisión científica.