سری نگر (15 نومبر 2025): بھارت کے زیرِ قبضہ جموں و کشمیر میں پولیس اسٹیشن میں دھماکا ہوا جس کے نتیجے میں 9 افراد ہلاک اور 29 زخمی ہوگئے۔خبر رساں ایجنسی روئٹرز کی رپورٹ کے مطابق جمعے کی رات پولیس اسٹیشن میں ضبط شدہ بارودی مواد میں دھماکے سے 9 افراد جان سے گئے۔روئٹرز کو ذرائع نے شناخت ظاہر نہ کرنے کی شرط پر بتایا کہ ہلاک ہونے والوں میں زیادہ تر پولیس اہلکار ہیں جو دھماکا خیز مواد کی جانچ کر رہے تھے، زخمیوں میں سے کچھ کی حالت نازک ہے۔ذرائع کے مطابق لاشوں کی شناخت کا عمل جاری ہے، کچھ زخمی مکمل طور پر جھلس گئے ہیں، دھماکے کی شدت اتنی زیادہ تھی کہ پولیس اسٹیشن سے 100، 200 میٹر فاصلے پر قریبی گھروں سے انسانی جسم کے کچھ اعضا برآمد ہوئے۔ایک مقامی پولیس اہلکار نے روئٹرز کو بتایا کہ نوگام پولیس اسٹیشن میں دھماکا ہوا، آگ نے کمپاؤنڈ کو اپنی لپیٹ میں لے لیا اور فائر ٹینڈرز کو موقع پر پہنچا دیا گیا۔