بوگوٹا (09 نومبر 2025): جنوبی امریکی ملک کولمبیا میں 82 سالہ خاتون کے پیٹ میں 40 سال سے بچے کی موجودگی کا انکشاف ہوا ہے۔رپورٹس کے مطابق 82 سالہ خاتون اپنے پیٹ درد کی وجہ سے ڈاکٹر کے پاس گئی لیکن بوڑھی خاتون اس وقت سکتے میں آ گئی جب اسے ایم آر آئی اسکین کے نتیجے میں بتایا گیا کہ اس کے پیٹ میں چالیس سال سے ایک بچہ رہ رہا ہے۔ڈاکٹرز کے مطابق ایسا بہت کم ہوتا ہے جب کسی خاتون کے ہاں حمل بچہ دانی کی بجائے باہر ٹھہر جائے، طبی زبان میں اس کو لیتھوپیڈین (Lethopedion) یا پتھریلا بچہ (Stone baby) کہا جاتا ہے۔ یہ کیفیت اُس وقت پیدا ہوتی ہے جب حمل رحم کی بجائے پیٹ کے اندر نشوونما پانے لگے۔ایسے معاملات میں جنین کو خون کی فراہمی ناکافی ہوتی ہے، جس کے باعث وہ زندہ نہیں رہ پاتا۔ جب جسم اس مردہ جنین کو قدرتی طور پر خارج نہیں کر پاتا تو وہ انفیکشن سے بچاؤ کے لیے ایک دفاعی عمل شروع کرتا ہے، اور آہستہ آہستہ اس جنین کو کیلشیم کی تہہ میں لپیٹ دیتا ہے، یہاں تک کہ وہ پتھر کی مانند سخت ہو جاتا ہے۔خاتون میں تقریباً 4 پاؤنڈ وزنی یہ کیلشیم زدہ جنین کئی دہائیوں تک نظر سے اوجھل رہا اور بالآخر ایکس رے اسکین کے ذریعے دریافت ہوا۔لیتھوپیڈین کے ایسے واقعات دنیا بھر میں انتہائی نایاب ہیں، اب تک محض چند سو کیسز ہی ریکارڈ پر آئے ہیں۔ اکثر مریضوں کو اس حالت کا پتہ برسوں تک نہیں چلتا، یہاں تک کہ کسی معمولی اسکین یا آپریشن کے دوران یہ اچانک دریافت ہو جاتا ہے۔