O Centro Galego de Tecnificación Deportiva (CGTD) de Pontevedra volveu encherse de enerxía, sorrisos e espírito solidario este domingo 9 de novembro coa celebración da XII Milla Solidaria "Móvete pola diabetes", organizada pola Asociación Anedia coa colaboración do Club Atletismo Rías Baixas e o Concello de Pontevedra. Esta cita, xa todo un clásico no calendario deportivo pontevedrés, combina deporte, convivencia e compromiso social, para concienciar sobre a importancia de manter hábitos de vida saudables e visibilizar a realidade das persoas con diabetes. "É unha proba 90% popular", destacaba o presidente do Atletismo Rías Baixas, Gonzalo Méndez, orgulloso do ambiente festivo e a alta participación. En total, ao redor de 300 corredores e corredoras sumáronse a esta iniciativa solidaria. Na Final Absoluta feminina, a vitoria foi para Laura Porto Patiño (Rías Baixas) cun tempo de 5:46.12, seguida de María Teresa Cimadevila Crujeiras (El Canario, 5:59.18) e Clara Mª Millares Sieira (El Canario, 6:38.21). A cuarta posición foi para Ana Oca González (CAI A Estrada, 7:11.58). Pola súa banda, na Final Absoluta masculina, o máis rápido foi Álex Sierpes Pereira (Vicky Foods Athletics) cun rexistro de 4:13.60. Acompañáronlle no podio Pablo Vicente López (Atletismo Vila de Cangas, 4:42.86) e Saúl Benítez Pérez (El Canario, 4:42.89). Completou o top 4 Esteban Díaz Pérez (Atletismo Narón, 4:44.24). CONSULTA AQUÍ TODOS OS RESULTADOS. A xornada comezou ás 10:30 da mañá coas millas populares, tanto feminina como masculina, para continuar coas probas federadas e as categorías infantís, que puxeron o broche máis tenro ao evento. Como novidade, este ano incorporouse un 100 metros popular, unha actividade simbólica para reforzar a lema desta edición: "Vivir con diabetes". Unha forma de lembrar que a convivencia con esta enfermidade tamén pasa polos estudos, o traballo… e, por suposto, o deporte. [galleries:vertical:10842]