సొంతగడ్డపై టెస్టుల్లో భారత్‌కు మరో పరాభవం ఎదురైంది. దక్షిణాఫ్రికాతో జరుగుతున్న తొలి టెస్టులో టీమిండియా 30 పరుగుల తేడాతో పరాజయం పాలైంది. బ్యాటర్ల వైఫల్యంతో 124 పరుగులు ఛేదించలేకపోయింది.కోల్‌కతాలోని ఈడెన్ గార్డెన్స్‌ వేదికగా దక్షిణాఫ్రికాతో జరిగిన తొలి టెస్టులో భారత్ పరాజయం పాలైంది. రెండో ఇన్నింగ్స్‌లో దక్షిణాఫ్రికా నిర్దేశించిన 124 పరుగుల లక్ష్యాన్ని ఛేదించలేకపోయిన టీమిండియా.. 93 పరుగులకే కుప్పకూలింది. ఈ మ్యాచ్‌లో తొలుత ప్రొటీస్ జట్టు తొలి ఇన్నింగ్స్‌లో 159 పరుగులకు ఆలౌట్ అయింది. అనంతరం భారత్.. 189 పరుగులు చేసింది. దీంతో కీలకమైన 30 పరుగుల ఆధిక్యాన్ని సంపాదించింది.ఇక రెండో ఇన్నింగ్స్‌లో దక్షిణాఫ్రికా 153 పరుగులకు ఆలౌట్ అయింది. భారత బౌలర్ల దెబ్బకు ప్రొటీస్ బ్యాటర్లు పెవిలియన్‌కు క్యూ కట్టారు. దీంతో ఈ మ్యాచ్‌లో భారత్ ఈజీగా గెలుస్తుందని అంతా భావించారు. లక్ష్యంగా 124 పరుగుల మాత్రమే కావడంతో విజయంపై ధీమాగా ఉన్నారు టీమిండియా ఫ్యాన్స్. కానీ ఇక్కడే ప్రొటీస్ జట్టు అద్భుతం చేసింది. టెస్టుల్లో తామెందుకు ప్రపంచ ఛాంపియన్‌ టీమో మరోసారి నిరూపించింది. సొంతగడ్డపై భారత బ్యాటర్లను కట్టడి చేసింది.124 పరుగుల లక్ష్యంతో బరిలోకి దిగిన భారత్‌కు.. ఆదిలోనే షాక్ తగిలింది. పరుగుల ఖాతా తెరవకముందే జైశ్వాల్ (0) పెవిలియన్ చేరిపోయాడు. ఆ తర్వాత కాసేపటికే కేఎల్ రాహుల్ (1) కూడా ఔట్ అయ్యాడు. శుభ్‌మన్ గిల్ గాయంతో దూరం కావడంతో ధ్రువ్ జురెల్ నాలుగో స్థానంలో బ్యాటింగ్‌కు వచ్చాడు. కానీ ధ్రువ్ జురెల్ (13), రిషభ్ పంత్ (2), రవీంద్ర జడేజా (18) కూడా విఫలమయ్యారు. దీంతో భారత్ వరుసగా వికెట్లు కోల్పోయింది.కానీ క్రీజులో వాషింగ్టన్ సుందర్ (31), అక్షర్ పటేల్ (26) ఉండటంతో భారత విజయంపై ధీమాగానే ఉంది. కానీ వారిద్దరూ టీమిండియాను గెలిపించలేకపోయారు. దీంతో 93 పరుగులకే భారత్ ఆలౌట్ అయింది. విజయానికి 30 పరుగుల దూరంలో ఆగిపోయింది. దక్షిణాఫ్రికా బౌలర్లలో రెండో ఇన్నింగ్స్‌లో సైమన్ హర్మర్ 4, మార్కో జాన్సన్ 2, కేశవ్ మహారాజ్ 2, ఎయిడెన్ మార్‌క్రమ్ 1 వికెట్ తీశారు. ఈ విజయంతో దక్షిణాఫ్రికా రెండు మ్యాచ్‌లో సిరీస్‌లో 1-0తో ఆధిక్యంలోకి వెళ్లింది. నవంబర్ 22 నుంచి గువహటి వేదికగా రెండో మ్యాచ్ జరగనుంది. సెకండ్ ఇన్నింగ్స్‌లో భారత బ్యాటర్లు చేతులెత్తేయగా.. సౌతాఫ్రికా కెప్టెన్ బవూమా మాత్రం 55 రన్స్‌తో అజేయంగా నిలవడం అతడి బ్యాటింగ్ సామర్థ్యానికి నిదర్శనంగా చెప్పొచ్చు.