Este luns 18 de agosto tivo lugar a incorporación dos alumnos de novo ingreso á Escola Naval Militar de Marín Ante a emocionada mirada dos seus familiares cruzaron a porta de Carlos I un total de 128 mozos, dos que 10 son mulleres. Como adoita ser habitual en todos estes actos castrenses, a Escola Naval enche de pompa e solemnidade este tipo de cerimonias e para iso non faltaron a unidade de música e os mandos: o comandante-director, xefe de estudos, comandantes de brigada e os seus brigadieres. Previamente, deuse lectura á resolución do seu nomeamento como novos Aspirantes. Tras a entrada dos alumnos, os pais e familiares tiveron ocasión de entrar na Escola Naval para asistir á conferencia, na que se lles informou de cal será o seu futuro durante o período académico que teñen por diante. Os aspirantes estarán até o 31 de agosto efectuando a fase de adaptación á vida militar, tras a cal, incorporarase o alumnado que ingresou por promoción interna para comezar o curso co resto das Brigadas da Escola Naval Militar de Marín. Desde a Escola Naval destácase que "este proceso se desenvolve baixo un marco de disciplina, responsabilidade e compromiso cos valores da institución". A incorporación dos aspirantes de novo ingreso á Escola Naval Militar de Marín constitúe o inicio da súa formación como futuros oficiais da Armada. [galleries:vertical:10690]