نئی دہلی: ایک لمبے انتظار کے بعد اتر پردیش میں ان دنوں ٹیچر و لیکچرر بننے کے خواہش مند امیدواروں کی راہ ہموار ہوئی ہے۔ امید ظاہر کی جا رہی ہے کہ ٹیچر و لیکچرر کی خالی پڑی اسامیوں کو پُر کرنے کیلئے مزید نئی بھرتیاں نکالی جا سکتی ہیں۔ اس درمیان اتر پردیش پبلک سروس کمیشن (یو پی پی ایس سی) نے گورنمنٹ انٹر کالج (جی آئی سی) میں لیکچرر کی خالی آسامیوں کی بھرتی کا نوٹیفکیشن جاری کر دیا ہے۔ اس بھرتی مہم کے تحت لیکچرر کی کُل 1516 خالی آسامیاں پُر کی جائیں گی۔دلچسپی رکھنے والے امیدوار اپنی درخواست 12 اگست سے 12 ستمبر 2025 تک دے سکتے ہیں۔ تاہم لکچرر کے عہدے کے لیے امیدواروں کا انتخاب تحریری امتحان کی بنیاد پر کیا جائے گا۔ اس کے بعد امتحان پاس کرنے والے امیدواروں کو انٹرویو کے لیے حاضر ہونا پڑے گا۔ بھرتی سے متعلق مزید معلومات حاصل کرنے کے لیے اور امیدوار اپنی درخواست دینے کے لیے کمیشن کی آفیشل ویب سائٹ https://uppsc.up.nic.in پر جا سکتے ہیں۔اس بھرتی میں درخواست دینے کے لیے امیدواروں کے پاس بی ایڈ یا اس کے مساوی تربیتی اہلیت کے ساتھ متعلقہ مضمون میں پوسٹ گریجویٹ ڈگری ہونی چاہیے۔ تاہم عمر کی حد کی بات کی جائے تو اس بھرتی میں درخواست دینے والے امیدواروں کی کم از کم عمر 21 سال اور زیادہ سے زیادہ عمر 40 سال ہونی چاہیے۔جن کا مضمون اُردو ہے ان کو ایک بار پھر سنہرا موقع ملا ہے۔ اتر پردیش پبلک سروس کمیشن (یو پی پی ایس سی) کے ذریعہ جاری کردہ نوٹیفیکیشن میں گورنمنٹ انٹر کالج (جی آئی سی) لیکچر کی بھرتی میں اُردو مضمون کی 40 اسامیاں ہیں جن میں مرد زمرے میں 27 اور خاتون زمرے میں 13 اسامیاں ہیں۔