بھارت میں چلتی ایمبولینس میں بیہوش لڑکی کو مبینہ طور پر ڈرائیور اور ٹیکنیشن نے زیادتی کا نشانہ بنا دیا۔بھارتی میڈیا رپورٹ کے مطابق ریاست بہار کے شہر بودھگیا کے بی ایم پی 3 پریڈ گراؤنڈ میں ہوم گارڈ کی بھرتی کے لیے فٹنس ٹیسٹ ہورہے تھے، دوڑ کے دوران نوجوان لڑکی اچانک بیہوش ہوگئی۔موقع پر موجود عملے نے ایمبولینس کو فوری طور پر بلایا تاکہ اسے اسپتال پہنچایا جاسکے۔متاثرہ لڑکی کو اسپتال لے جاتے ہوئے ایمبولینس کے ڈرائیور ونے کمار اور ٹیکینیشن اجیت کمار نے زیادتی کا نشانہ بنایا۔اسپتال پہنچنے کے بعد جب لڑکی کو ہوش آیا تو اس نے ڈاکٹروں کو بتایا کہ اسپتال لے جاتے وقت چلتی ایمبولینس میں میرے ساتھ زیادتی کی گئی ہے۔ڈاکٹر نے فوری طور پر پولیس کو مطلع کیا جس کے بعد پولیس نے کارروائی کرتے ہوئے دونوں ملزمان کو گرفتار کرلیا۔سینئر سپرنٹنڈنٹ آف پولیس آنند کمار نے بتایا کہ متاثرہ لڑکی کی شکایت کے بعد ٹیم تشکیل دی گئی جس کی قیادت ایس ڈی پی او سوربھ جیسوال نے کی اور ٹیم نے فوری چھاپہ مار کارروائی کے دوران دونوں ملزمان کو گرفتار کیا۔پولیس کے مطابق پریڈ گراؤنڈ اور ایمبولینس کے راستے میں لگے سی سی ٹی وی کیمروں کی مدد سے ملزمان کی گرفتاری عمل میں آئی، دونوں ملزمان کے خلاف مقدمہ درج کرلیا گیا ہے۔