早前先食過一家酒吧餐廳，質素確喺唔錯，最後約咗個老死食飯，又揀嚟一家酒吧餐廳，位處「河內道」，正正K11對面，尖東站N1出口一上地面就見，啱晒我搭屯馬線返屋企，呢排天氣唔穩定，落雨都唔使怕。以前啲人話去酒吧，感覺又嘈又雜，但依家好多酒吧餐廳已經唔同晒，唔會話好嘈吵，同朋友食飯傾偈都好氣氛。好似呢度，裝修摩登精緻，樓底特高，所以，空間感十足，又富氣氛，而皮椅坐落軟熟舒服，目測所見，都幾多客人幫襯。順帶一提，服務非常好，侍應好細心介紹菜式，又不時幫忙添水。先介紹吓散點餐牌，依家啲酒吧餐廳唔止食物多選擇，而且，做出嚟嘅質素都非常高。翻一翻餐牌，分類而言，有沙律、湯品、小食、特色冷盤、意大利麵、意大利飯、主菜及甜品；此外，仲有一款二人晚餐，唯可惜唔記得影飲品餐牌，不過，既為酒吧，酒精類飲品選擇一定多。柚子味噌南瓜羽衣甘藍沙律 $108先嚟一道沙律幫大家開開胃，睇樣好似平平無奇，但食落真喺有深度，羽衣甘藍本身帶點點苦味，但加咗柚子醋，味道變得更加清爽，除咗南瓜，仲有啲茄子，以味噌煮過，所以，味道嘅層次變得豐富咗，仲加上藜麥同杏仁片，令口感更唔單一，真好食。炸蕃薯條 $78、日本海苔魷魚配蜜糖芥末醬 $88雖然我哋就無飲啤酒，但都嗌咁兩份小食過過口癮。先分享份炸蕃薯條，炸得金香，入口脆而不膩，沾上茄醬，甜甜酸酸都幾得意；而炸魷條嘅脆漿夠薄，最特別喺個脆漿加咗紫菜，令味道多元化咗，魷魚嘅口感柔韌，沾上蜜糖芥末醬，唔使講就更加好食啦。黑松露薏米飯伴巴馬火腿配黑醋汁 $148主食方面，朋友問揀意大利麵好，定意大利飯好，小弟就梗喺建議意大利飯啦，因為意大利易煮難精，煮得好食真喺唔容易。眼前呢碟就確喺煮得唔錯，飯粒濕潤，有咬口感，而且，除加入大量菇菌，神來之筆嘅炸金落之外，黑松露醬落得一啲都無手緊，個飯送上枱已聞到好香嘅黑松露香氣；此外，巴馬火腿食得出喺靚貨，鹹香油潤，無話乾爭爭呀，黐住好多肥膏呀！慢煮和牛面肉伴薯蓉、炸大蒜絲、豆苗沙律 $198另一道主食，就揀咗主菜類嘅慢煮和牛面肉，以往都食過好幾次牛面肉，向來呢道菜都好少有失手，今次晌度所食嘅都無令人失望，嚿牛面肉非常大件，有成個大拳頭咁大，炆煮得非常鬆化，刀叉一拉就撕開成一絲絲咁，而且，好有肉香；至於啲薯蓉搓得好軟滑，又好有薯香，份量十足，實在好味。今餐同老友開懷暢食，除食物好，皆因環境又舒服，讓我哋可以暢談。講到旅遊，老友遲啲去北歐，先預祝行程順利，返嚟聚一聚再食餐好嘅。個人評分 味道：9/10 環境：9/10 服務：9/10 抵食：9/10 平均每人消費：HK$340餐廳資料： PaPaGayo 地址：尖沙咀河內道5號普基商業中心地下3號舖 電話：2377 1566