Fake Documents Loan: తీసుకునే వారి సంఖ్య ఎక్కువే ఉంటుంది. చాలా వరకు లోన్లు ఈజీగా మంజూరు చేస్తుండటం సహా ఈఎంఐల్లో చెల్లించే సదుపాయం ఉండటం, పెరుగుతున్న అవసరాలు ఇందుకు కారణం అని చెప్పొచ్చు. అయితే ఇతర గోల్డ్ లోన్, హోం లోన్, వెహికిల్ లోన్ వంటి వాటితో పోలిస్తే.. పర్సనల్ లోన్ వడ్డీ రేట్లు ఎక్కువగా ఉంటాయి కూడా. ఇక్కడ మనం ఏం తనఖా పెట్టము కాబట్టి వీటిని అన్‌సెక్యుర్డ్ లోన్లు అంటారు. అందుకే ఇలా అన్నింటినీ పరిగణనలోకి తీసుకోవాల్సి ఉంటుంది. అయితే ఇటీవల గుజరాత్‌లోని దహోద్ పట్టణంలో.. రెండు ఎస్బీఐ బ్రాంచుల్లో రూ. 5.5 కోట్ల పర్సనల్ లోన్ స్కామ్ వెలుగులోకి వచ్చింది. ఇందులో 29 మంది రుణగ్రహీతలు నకిలీ పత్రాల్ని ఉపయోగించి లోన్లు పొందారు. ఇద్దరు బ్యాంకు మేనేజర్లు, కొందరు మధ్యవర్తులు కుమ్మక్కై ఈ మోసానికి పాల్పడినట్లు తెలిసింది. అంతర్గత ఆడిట్‌లో లోపాలు బయటపడటంతో ఈ కుంభకోణం విషయం వెలుగులోకి వచ్చింది. ఇక ఈ కేసుకు సంబంధించి పోలీసులు.. ఇద్దరు మేనేజర్లను, ముగ్గురు రుణగ్రహీతలను అరెస్టు చేశారు.దహోద్‌లో కొందరు రుణగ్రహీతలు ఎక్కువ లోన్ పొందడానికి అర్హత సాధించేందుకు.. తమ పే స్లిప్‌లను పెంచినట్లు గుర్తించారు. రెండు SBI బ్రాంచ్‌ల్లో (యాద్గార్ చౌక్ మెయిన్ బ్రాంచ్, స్టేషన్ రోడ్ బ్రాంచ్ దహోద్ టౌన్).. 29 మంది రుణ దరఖాస్తుదారులు ఫేక్ శాలరీ స్లిప్స్ వంటి నకిలీ పత్రాలను ఉపయోగించి లోన్లు మంజూరు చేయించుకున్నారు. వీరిలో 17 మంది ప్రభుత్వ ఉద్యోగులు.. తమ పత్రాలను ఫోర్జరీ చేసి జీతాలు పెంచుకున్నారు. మరో 10 మంది ప్రభుత్వ ఉద్యోగులమని పూర్తిగా అబద్ధపు పత్రాలను సృష్టించి లోన్లు పొందారు. బ్యాంకులేం చేయాలి?పర్సనల్ లోన్లు హామీ లేనివి కాబట్టి.. రుణాలు ఇచ్చే ముందు బ్యాంకులు తగిన శ్రద్ధ వహించాలి. రుణగ్రహీతల క్రెడిట్ అర్హతను తెలుసుకోవడానికి బ్యాంకులు సాధారణంగా పే స్లిప్స్, దరఖాస్తుదారుల ఉద్యోగ చరిత్రను పరిశీలిస్తాయి. పే స్లిప్‌లో చూపిన జీతం ఆధారంగా.. రుణ మొత్తాన్ని సులభంగా తిరిగి చెల్లించగలరా అని కూడా వారు అంచనా వేస్తారు. బ్యాంకులు సాధారణంగా రుణగ్రహీతలకు నెల జీతం కంటే 20 రెట్ల వరకు వ్యక్తిగత రుణాల్ని మంజూరు చేయొచ్చు. ఉదాహరణకు.. ఒక వ్యక్తి నెల జీతం రూ. 1 లక్ష అయితే.. బ్యాంకు రూ. 20 లక్షల వరకు లోన్ మంజూరు చేయొచ్చు. లోన్ కోసం అప్లై చేసే ముందు గుర్తుంచుకోవాల్సిన ముఖ్య విషయాలు ఇవే..>> ప్రలోభాలకు గురైనా లేదా స్నేహితుడు లేదా సహచరుడు చెప్పినా.. నకిలీ పత్రాన్ని (ఫేక్ డాక్యుమెంట్) ఎప్పుడూ ఉపయోగించొద్దు. ముందు ఇది ఇబ్బందేం కలిగించనట్లు అనిపించినా సరే పర్యవసానాలను ముందే గుర్తించి జాగ్రత్త పడాలి. మీ ఉద్యోగం, ఆదాయాన్ని సూచించే.. నిజమైన పత్రాలను ఉపయోగించండి.స్కూల్‌లో చేరడం దగ్గర్నుంచి.. ఉద్యోగ దరఖాస్తు వరకు దాదాపు ప్రతిదానికీ ఎవరి సహాయమైనా తీసుకోవడం మన సంస్కృతి. కానీ మారుతున్న టెక్నాలజీ కారణంగా.. ఇప్పుడు రుణ దరఖాస్తులకు ఎక్కువ మానవ ప్రమేయం అవసరం లేదు. కాబట్టి, ఏజెంట్ ద్వారా రుణదాతను సంప్రదించే బదులు నేరుగా ఆన్‌లైన్‌లో ఫిన్‌టెక్ ప్లాట్‌ఫారమ్‌లో లేదా బ్యాంక్ వెబ్‌సైట్‌లో లోన్ కోసం దరఖాస్తు చేసుకోవచ్చు.లోన్ మొత్తం అనేది మీరు చెల్లించగలిగే స్థోమత ఆధారంగా తీసుకోవడం ఉత్తమం. పొరపాటున కూడా ఎక్కువ తీసుకొని ఇబ్బందులు పడొద్దు. అంటే లోన్ మొత్తం ఎంత తక్కువ ఉంటే.. అంత మంచిదని గుర్తుంచుకోవాలి. పర్సనల్ లోన్ పొందడంతోనే అంతా అయిపోదు. మంచి క్రెడిట్ స్కోరును నిర్వహించేందుకు రుణం సకాలంలో చెల్లించగలగాలి. లోన్ తిరిగి చెల్లించడంలో విఫలమైతే.. మీ ప్రొఫైల్ పేలవమైన క్రెడిట్ స్కోర్ కారణంగా బ్లాక్‌లిస్ట్‌లో చేరొచ్చు.