O Estadio Municipal de San Pedro foi escenario este luns do inicio da pretempada do Marín CF. Un feito que podería pasar desapercibido pero que esta campaña centra os focos ao ser o proxecto marinense máis ambicioso dos últimos anos. No seu plantel aparecen nomes de futbolistas que até fai poucos mese competían en Terceira RFEF ou mesmo en Segunda RFEF, caso dun Víctor Vázquez 'Churre' protagonista do ascenso do Pontevedra á terceira categoría nacional. Xunto ao experimentado central baixan directamente á Primeira Autonómica coa o Marín desde Terceira RFEF o dianteiro Sylla (Boiro) e Álex Rey (Boiro), mentres que Jacobo Millán e Pablo Barrio foron importantes no ascenso do Juventud Cambados a Terceira, así como Javi Pazos, dianteiro con pasado en Pontevedra, Arosa ou Arenteiro e que co Barco campión en Preferente anotou a pasada campaña 24 tantos. A nómina de fichaxes complétana Diego Patiño, Pablo Pereira, Oski, Marc e Saúl. Continúan no equipo que dirixirá Sergio Martín desde o banco os xogadores Pablo Portas, Cristian, Aitor Díaz, Ángel García, Nico, Pedro Espiña, Antón Vázquez, David e Guille, e realizarán a pretempada co primeiro equipo os canteiráns Pablo Patiño, Cristian del Río e Joel Peixoto. A presentación oficial do Marín CF 25-26 realizarase o próximo 29 de agosto co XXIV Trofeo Villa de Marín que lle enfrontará ao CD Boiro no Municipal de San Pedro. Antes, a primeira proba chegará o día 2 de agosto fronte ao Villalonga.