Todo está listo en Bueu para o inicio dunha nova edición, a número 22, do festival SonRías Baixas, que se celebrará entre este xoves 31 de xullo e o domingo 3 de agosto. O recinto das Lagoas, onde se desenvolverá o festival, acolleu este martes a presentación dun evento que xa é por méritos propios unha das citas musicais ineludibles da tempada estival. Dani Fernández, Judeline, La Raíz, Carolina Durante Baiuca, Sen Senra, Grande Amore, The Rapants, Nena Daconte, Alizz, Sabela, Shego ou Carlos Ares son algúns dos grandes nomes que encabezan esta edición, que xuntará de novo artistas de todos os estilos e xéneros. Todos os grupos, segundo explicaron os organizadores, presentarán os seus novos traballos musicais desde os dous escenarios instalados nun recinto que contará coa súa propia área gastronómica e unha zona de acampada anexa. Jordi Lauren e Berta Domínguez, responsables do festival, destacaron que o SonRías Baixas crece este ano "non só en espazo senón tamén en número de días" ao estenderse por vez primeira a catro xornadas, o que obrigou a contratar máis artistas que nunca. Presentación do festival SonRías Baixas 2025Deputación de Pontevedra - Rafa Estévez "Estamos a falar ante a edición máis completa do festival musicalmente hablando", subliñaron, explicando que artistas que comezaron tocando na sesión vermú como Grande Amore ou Marlena "agora xa tocan no escenario principal". Ademais, defenderon o compromiso do SonRías Baixas coas bandas e artistas galegos, que serán un terzo do total de actuacións, e cos grupos e proxectos de primeira liña liderados ou participados por mulleres. Na presentación do festival participou o director da Axencia Galega das Industrias Culturais, Jacobo Sutil, para quen o SonRías Baixas é un "referente" en Galicia polo seu espírito "innovador e de constante renovación", ofrecendo unha "experiencia completa" aos asistentes. Pola súa banda, o presidente da Deputación de Pontevedra, Luis López, animou a todos a asistir porque este festival "sempre é sinónimo de disfrute"; e a edil de Cultura en Bueu, Carmen García, puxo en valor o evento porque "a cultura move Bueu e Bueu move a cultura". O SonRías Baixas marcouse o obxectivo de superar o récord de asistencia que bateron na pasada edición, na que reuniron máis de 26.800 asistentes, xerando na zona un impacto económico valorado nuns 2,3 millones de euros.