: తల్లిదండ్రులు ఎవరైనా తమ పిల్లలకు మంచి చదువు, సంస్కారం, సంపద ఇవ్వాలని కోరుకుంటారు. ఇందుకోసం రేయింబవళ్లు కష్టపడుతుంటారు. ఆ కష్టం కనబడనీయరు. తమ పిల్లలు ఇబ్బందుల్లేకుండా.. సంతోషంగా ఉండాలని వారి కోసమే కలలు గంటూ పైసా పైసా కూడబెడుతుంటారు. అయితే.. పిల్లలకు విద్య, సంస్కారంతో పాటుగానే ఆర్థిక జ్ఞానం కూడా ముఖ్యమని చెబుతున్నారు నిపుణులు. అంటే ఎక్కువగా డబ్బు గురించి, తమ ఇబ్బందుల గురించి.. పేరెంట్స్ పిల్లల ముందు మాట్లాడేందుకు సంకోచిస్తుంటారు. 'వారికి మన ఇబ్బందులు, కష్టాల గురించి తెలియనీయొద్దు" అని సరిపెట్టుకుంటారు.అయితే వాస్తవమేంటంటే.. '. చిన్నప్పటి నుంచే దీనిపై అవగాహన పెంచకుంటే.. భవిష్యత్తులో ఆర్థిక సవాళ్లను ఎదుర్కోవాల్సి వస్తుంది" అని నిపుణులు హెచ్చరిస్తున్నారు. బడి చదువులు మాత్రమే కాదు.. ఆర్థిక ప్రయోజకులుగా తీర్చిదిద్దడం కూడా తల్లిదండ్రుల చేతుల్లోనే ఉంది. తరగతి గదిలో నేర్చుకునే గణితం అంకెల వరకే పరిమితమవ్వొచ్చు. అదే నిజ జీవితంలో ఎదురయ్యే ఆర్థిక లెక్కలే అసలైన జ్ఞానం అందిస్తుంటాయి. అందుకే.. పిల్లలకు కాస్త ఊహ తెలిసినప్పటి నుంచే హోమ్ బడ్జెట్, సేవింగ్స్, ఇన్వెస్ట్‌మెంట్స్ వంటి విషయాల గురించి మెల్లమెల్లగా చెబుతూ ఉండాలని సూచిస్తున్నారు. మరి వారికి ఎలా వీటిని పరిచయం చేయాలో చూద్దాం. >> బట్టీ చదువులే కాదు.. ప్రాక్టికల్‌గా చూయిస్తేనే పిల్లలకు ఏదైనా తెలుస్తుంది. ఉదాహరణకు మీరు కిరాణా సరుకులు తెచ్చేందుకు వెళ్లినప్పుడు లేదా షాపింగ్‌కు వెళ్లినప్పుడు పిల్లల్ని తీసుకెళ్లండి. వారికి కొంత బడ్జె్ట్ చెప్పి.. ఆ పరిమితిలోనే వస్తువుల్ని కొనుగోలు చేయాలని చెప్పండి. ఇలా చేస్తే.. డబ్బు వాల్యూ, ప్రియార్టీలను ఎలా సెట్ చేసుకోవాలో తెలుసుకుంటారు. ఇలా చిన్నప్పటి నుంచే ఆర్థిక పాఠాలు నేర్చుకుంటారు. >> ఆర్థిక పాఠాలు అంటే ఇక్కడ సంపాదించడం, ఖర్చు చేయడమే కాదు.. పొదుపు, పెట్టుబడుల గురించి కూడా చెప్పాలి. ఇంకా మ్యూచువల్ ఫండ్స్‌లో మీరు సిప్ చేస్తుంటే అది ఏ లక్ష్యం కోసం అనేది పిల్లలకు చెప్పండి. అంటే పిల్లల భవిష్యత్ చదువుల కోసం, ఇల్లు కట్టడం కోసం అని చెప్పాలి. ఇంకా ఈఎంఐలు ఎలా ఉన్నాయి.. ఎంత కడుతున్నారనే దానిపై వివరంగా చెప్పాలి. అది వారి దీర్ఘకాలిక ఆర్థిక బాధ్యతలపై అవగాహన కల్పిస్తుంది. >> ఇంకా ఎమర్జెన్సీ ఫండ్ గురించి పిల్లలకు చిన్న వయసులోనే చెప్పాలి. అత్యవసర పరిస్థితుల్లో (ఊహించని ఖర్చుల కోసం, ఉద్యోగం కోల్పోయిన సందర్భంలో) ఈ నిధి ఎలా ఉపయోగపడుతుందో చెప్పాలి. ఇలాంటి పరిస్థితి వస్తే మీకు ఎలా ఉపయోగపడిందో వివరించాలి. ఇది భవిష్యత్తులో ఆర్థిక భద్రత గురించి వారికి తెలిసొచ్చేలా చేస్తుంది.>> చిన్న వయసులోనే పిల్లలకు పొదుపు అలవాటును ప్రోత్సహించాలి. వారికి ఒక పిగ్గీ బ్యాంక్ కొనివ్వాలి. వారికి వచ్చే గిఫ్ట్స్ డబ్బుల్ని అందులో దాచుకోవాలని ప్రోత్సహించాలి. కాస్త పెద్దయ్యాక వారి పేరిట బ్యాంక్ అకౌంట్ ఇప్పించండి. వారికి ఇచ్చే పాకెట్ మనీలో కొంత భాగం అందులో పొదుపు చేయమని చెప్పాలి. ఖర్చు చేయడానికి ముందే పొదుపు చేయాలనేది వారికి తెలియజెప్పాలి. >> ఖర్చు, సంపాదన, పొదుపుతో పాటే జీవితాన్ని ఆస్వాదించడం కూడా చాలా ముఖ్యం. సంపాదనలో కొంత భాగం ఫ్యామిలీ వెకేషన్స్ కోసం వెచ్చించాలి. ఏడాది చివర్లో ఫలానా పర్యటక లేదా ఆధ్యా్త్మిక ప్రదేశానికి వెళదామని పిల్లలకు చెప్పాలి. దీని కోసం నెలనెలా మీరు ఎంత పొదుపు చేస్తున్నారు.. ఎలా చేస్తున్నారు అనేది చెప్పాలి. కాబట్టి.. ఇలా పిల్లల భవితను నిర్ణయించడంలో.. అలా తీర్చిదిద్దడంలో తల్లిదండ్రుల పాత్ర కీలకం. చదువు, సంస్కారం చెప్పడంతో పాటు ఆర్థిక భవిష్యత్తుకు కూడా ఇలా పునాది వేయాలి. అప్పుడే పిల్లల్ని ఆత్మవిశ్వాసంతో.. బాధ్యతాయుత వ్యక్తులుగా తీర్చిదిద్దొచ్చు.