A residencia de estudantes Afundación, a única das súas características existente actualmente en Pontevedra, completa ocupación para o próximo curso. Un total de 120 mozos aloxaranse nesta residencia, que, tras 66 anos de historia, foi obxecto dunha profunda reforma nos últimos meses. Envolventes, ascensores, habitacións, zonas comúns e xardíns foron obxecto das obras de renovación. A finais de xullo, os operarios apuran as últimas obras, as correspondentes ás pistas deportivas e o hall do centro, para que estean terminadas antes do inicio do curso. A Obra Social de ABANCA dedicou máis dun millón de euros á reforma, que supón importantes melloras en sustentabilidade e eficiencia enerxética, accesibilidade e estética. Durante este verán, xa puideron probar esas melloras máis de 300 persoas participantes en Special Olympics Galicia, un proxecto que ofrece ás persoas con discapacidade intelectual unha ampla oferta de actividades para que gocen das súas vacacións na Residencia de Estudantes. Esta residencia situada na avenida de Vigo conta con 50 habitacións dobres, 5 das cales están habilitadas para persoas con mobilidade reducida, e 43 individuais. O edificio da Residencia ten unha superficie de máis de 5.000 metros cadrados distribuídos en 5 plantas nas que tamén hai salas de estudo, salas de xogos, de televisión ou aulas.