మెగాస్టార్ నటిస్తున్న 'విశ్వంభర' సినిమా కోసం మెగా అభిమానులు ఆసక్తిగా ఎదురు చూస్తున్నారు. మల్లిడి వసిష్ఠ దర్శకత్వంలో భారీ స్థాయిలో ఈ సోషియో ఫాంటసీ యాక్షన్ అడ్వెంచర్ మూవీ తెరకెక్కుతోంది. చాలాకాలంగా సెట్స్ మీదున్న ఈ చిత్రం ఇటీవలే షూటింగ్ కంప్లీట్ చేసుకుంది. చివరి షెడ్యూల్ లో ఓ స్పెషల్ సాంగ్ ను షూట్ చేశారు. మేకర్స్ ఈ విషయాన్ని అధికారికంగా ప్రకటించారు. కానీ ప్రత్యేక గీతంలో బాస్ పక్కన ఆడిపాడిన అందాల భామ ఎవరనేది మాత్రం వెల్లడించలేదు. అయితే ఇప్పుడు ఆమె ఎవరనేది రివీల్ అయిపోయింది. 'విశ్వంభర' సినిమాలో స్పెషల్ సాంగ్ కోసం బాలీవుడ్ బ్యూటీ మౌని రాయ్ ని తీసుకున్నట్టు చాలా రోజులుగా ప్రచారం జరుగుతోంది. ఫిలిం సర్కిల్స్ లో ఈ సంగతి అందరికీ తెలుసు కానీ, మేకర్స్ సైడ్ నుంచి అఫిషియల్ అనౌన్స్ మెంట్ రాలేదు. ఇటీవల చిత్ర బృందం సోషల్ మీడియాలో షేర్ చేసిన వీడియో, ఫోటోలలో కూడా ఆమె కనిపించకుండా జాగ్రత్త పడ్డారు. దీంతో ఏదైనా ప్రత్యేక సందర్భంలో చిరంజీవి సినిమాలో ప్రత్యేక గీతంలో నటించిన హీరోయిన్ ని అధికారికంగా ప్రకటిస్తారని అందరూ అనుకున్నారు. కానీ ఇప్పుడు తాజాగా మౌని రాయ్ స్వయంగా ఈ విషయాన్ని లీక్ చేసేసింది. 'విశ్వంభర' చిత్రంలో చిరంజీవితో కలిసి తాను స్పెషల్ సాంగ్ చేసినట్లుగా ఇన్‌స్టాగ్రామ్ లో మౌనీ రాయ్ బుధవారం ఓ పోస్ట్ పెట్టింది. లెజండరీ యాక్టర్ పక్కన డ్యాన్స్ చేశాననే ఆనందాన్ని వ్యక్తం చేస్తూ, బాస్‌తో కలిసున్న రెండు ఫోటోలని షేర్ చేసింది. అక్కడితో ఆగకుండా షూటింగ్ వీడియో క్లిప్, డ్యాన్స్ ప్రాక్టీస్ చేస్తున్న వీడియోని కూడా పంచుకుంది. దీనికి చిరుని కూడా ట్యాగ్ చేసింది. దీంతో మేకర్స్ దాచిపెట్టిన అప్డేట్, ఓపెన్ అయిపోయింది. దీంతో పాటుగా ఈ పాటలో చిరు గెటప్, సెటప్ రివీల్ అయింది. మామూలుగా మెగాస్టార్ తన సినిమాలకు సంబంధించిన లీక్స్ ఇస్తున్నారు. చిరు లీక్స్ ని మించిపోయేలా మౌనీ రాయ్ ఫొటోలతో పాటుగా వీడియోని కూడా లీక్ చేసిందని నెటిజన్లు కామెంట్స్ చేస్తున్నారు. ''గత కొన్ని రోజులుగా చిరంజీవి సార్ పక్కన డ్యాన్స్ చేసినందుకు ఎంతో గౌరవంగా భావిస్తున్నాను. ఆయనొక లెజెండరీ నటుడు మాత్రమే కాదు, అంతకంటే మంచి మనిషి కూడా. ఈ అద్భుతమైన అనుభవాన్ని ఎప్పటికీ మర్చిపోలేను. మీ ఆప్యాయతకు, బెస్ట్ బిర్యానీకి ధన్యవాదాలు. మేము మిమ్మల్ని ప్రేమిస్తున్నాము. గణేష్ ఆచార్య మాస్టర్ తో ఈ నెలలో మరోసారి కలిసి పనిచేయడం, రెండు పాటలలో ఆయన్నుంచి ఎన్నో విషయాలు నేర్చుకోవడం ఎంతో అదృష్టం. రిహార్సల్స్‌లో నా డ్యాన్స్ రొటీన్‌ను ఆయనకు చూపించడానికి నేను ఎప్పుడూ భయపడడుతుంటాను. త్వరలో కలుద్దాం. విశ్వంభర పాటను మీ అందరికీ చూపించడానికి ఆసక్తిగా ఎదురుచూస్తున్నాను'' అని మౌనీ రాయ్ పోస్టులో పేర్కొన్నారు. ఆమె షేర్ చేసిన ఫోటోలు ప్రస్తుతం నెట్టింట వైరల్ అయ్యాయి. అయితే కాస్త ఆలస్యంగా ఈ విషయం గ్రహించిన ఈ బ్యూటీ.. ఆ పోస్ట్ ని డిలీట్ చేసింది. కానీ అప్పటికే జరగాల్సిన నష్టం జరిగిపోయింది. 'విశ్వంభర' సినిమాలో చిరంజీవి సరసన త్రిష కృష్ణన్ హీరోయిన్ గా నటిస్తున్నారు. ఆషికా రంగనాథ్ కీలక పాత్ర పోషిస్తుండగా.. సురభి, ఇషా చావ్లా, సౌరవ్ లోకేష్ ఇతర పాత్రల్లో నటిస్తున్నారు. ఎంఎం కీరవాణి ఈ చిత్రానికి సంగీతం సమకూర్చారు. స్పెషల్ సాంగ్ కి మాత్రం భీమ్స్ సిసిరోలియో ట్యూన్స్ కంపోజ్ చేశారు. ఛోటా కె నాయుడు సినిమాటోగ్రఫీ నిర్వహించారు. ఏఎస్ ప్రకాష్ ప్రొడక్షన్ డిజైనర్ గా చేశారు. యూవీ క్రియేషన్స్ బ్యానర్ లో విక్రమ్, వంశీ, ప్రమోద్ భారీ బడ్జెట్ తో ఈ సినిమాని నిర్మిస్తున్నారు.