Ninguén se quixo perder unha das festas gastronómicas máis emblemáticas do verán galego, a Festa do Carneiro ao Espeto de Moraña, que chegou á súa edición número 56. Baixo unha calor de xustiza, amortecido en parte pola sombra das árbores que integran a carballeira de Santa Lucía, miles de persoas degustaron este manxar que, como ano, elaboraron con mimo e moita dedicación os organizadores desta festa. A Festa do Carneiro ao Espeto de Moraña, declarada festa de interese turístico galego, volveu a reunir aos asistentes ao redor da cociña tradicional e a cultura popular. Ao sete da mañá xa se acendeu o lume para comezar a asar os exemplares de carneiro que se serviron aos comensais. Como é habitual esgotáronse todos os lotes postos á venda, a 400 euros cada un e con comida suficiente para vinte persoas. Asistentes á LVI Festa do Carneiro ao EspetoCristina Saiz Ademais da carne protagonista desta festa, unha peza de até 14 quilos asada a lume lento durante horas, estes lotes incluían unha empanada de zorza e outra de bacallau, bolos de pan, botellas de viño tinto e de auga, salsa para o asado, café e augardente. Entre as autoridades que se achegaron este domingo a Moraña para degustar o carneiro ao espeto estivo o presidente da Deputación, Luís López, que cualificou a esta festa como unha das "grandes celebracións gastronómicas" de Galicia. A el sumáronse, entre outros, o conselleiro de Cultura, Lingua e Xuventude, José López Campos, ou o presidente da Xunta de Galicia, Alfonso Rueda. Rueda, que percorreu a carballeira para saudar aos asistentes a esta xornada, celebrou o ambiente festivo no que se desenvolveu, o respecto polas tradicións e a posta en valor da identidade local pola que aposta cada ano esta festa gastronómica. A música completou a xornada grande desta LVI Festa do Carneiro ao Espeto. A sobremesa estivo amenizada pola charanga Vos Encerellados e un concerto do grupo De Vacas e a verbena coa orquestra Panorama foron os encargados de animar a festa até altas horas da madrugada. [galleries:vertical:10615]