Un novo incendio forestal volveu causar preocupación este mércores nos montes de Sanxenxo. Nesta ocasión, o lume declarouse a media tarde no lugar de Pontes, na parroquia de Noalla. Segundo a información facilitada polo Concello de Sanxenxo, as tarefas de extinción centráronse na contorna dunha casa, para protexela e evitar a chegada do lume. Ás 19.00 horas, fontes oficiais confirmaron que a casa xa non corría perigo. Previamente, decidiuse desalojar á parella que reside na vivenda, por precaución. Incendio forestal en Pontes, NoallaConcello de Sanxenxo Até o lugar desprazáronse medios municipais e tamén autonómicos para proceder aos labores de extinción. Así, despregáronse a Policía Local e Emerxencias de Sanxenxo e tamén os Bombeiros de Vilagarcía e a Garda Civil. A Consellería de Medio Rural despregou un helicóptero e 10 brigadistas, segundo informou o Concello. A Consellería de Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún incendio forestal. Ademais, existe un teléfono anónimo e gratuíto para denunciar calquera actividade delituosa incendiaria, o 900 815 085.