ہری دوار کے منسا دیوی مندر میں کل ہوئی بھگدڑ کے بعد آج اتر پردیش کے بارہ بنکی میں بھی اسی طرح کا حادثہ پیش آیا ہے۔ ساون کے تیسرے سوموار کو ضلع کے حیدر گڑھ علاقے میں واقع مشہور اوسانیشور مہادیو مندر میں ’جلابھیشیک‘ کے دوران اچانک کرنٹ پھیلنے کی خبر سے بھگدڑ مچ گئی۔ اس حادثے میں دو عقیت مندوں کی موت ہو گئی جبکہ 40 لوگ زخمی بتائے جا رہے ہیں۔عینی شاہدین کے مطابق یہ حادثہ صبح قریب 3 بجے اس وقت پیش آیا جب بھاری تعداد میں عقیدت مند ’جلابھیشیک‘ کے لیے مندر کے احاطہ میں جمع تھے۔ بتایا جا رہا ہے کہ اسی دوران ایک بندر بجلی کے تار پر کود گیا جس سے تار ٹوٹ کر مندر احاطہ کے ٹین شیڈ پر گر گیا۔ تار کے گرتے ہی اس میں سے کرنٹ شیڈ میں پھیل گیا، جس سے وہاں موجود لوگ دہشت میں آ گئے اور بھگدڑ مچ گئی۔جائے حادثہ پر پہنچے ڈی ایم ششانک ترپاٹھی نے بتایا کہ آج عقیدت مند میں درشن کے لیے آئے تھے۔ کچھ بندر بجلی کے تار پر کود گئے جس سے شیڈ میں کرنٹ پھیل گئی۔ ڈی ایم کے مطابق تقریباً 19 لوگوں کو بجلی کا جھٹکا لگا۔ انہیں سی ایچ سی حیدر گڑھ اور دوسری جگہوں پر علاج کے لیے لے جایا گیا۔#WATCH | Barabanki, Uttar Pradesh | Barabanki DM Shashank Tripathi says, "Devotees came to Ausaneshwar Mahadev temple to offer prayers on Monday of the 'saavan' month. The electric wire broke and fell on the shed. Around 19 people were injured by electric shock. The injured were… pic.twitter.com/Vitn7dzVih— ANI (@ANI) July 28, 2025مرنے والوں میں لونی کٹرا تھانہ حلقہ کے مبارک پورہ گاؤں کے باشندہ پرشانت (22) اور ایک دیگر عقیدت مند شامل ہے۔ دونوں کو ترویدی گنج سی ایچ سی میں علاج کے لیے لایا گیا تھا، لیکن ان کی جان نہیں بچ سکی۔اتر پردیش کے وزیر اعلیٰ یوگی آدتیہ ناتھ نے بارہ بنکی میں ہوئے حادثے پر گہرے صدمے کا اظہار کرتے ہوئے سوگوار کنبوں کے لیے تعزیت کی ہے۔ ساتھ ہی افسروں کو فوری طور پر موقع پر پہنچ کر راحت اور بچاؤ کام میں تیزی لانے کی ہدایت دی ہے۔واضح رہے کہ ایک دن پہلے ہی اتوار کی صبح ہری دوار کے مشہور منسا دیوی مندر میں بھی بھگدڑ مچ گئی تھی جس میں 6 لوگوں کی جان چلی گئی تھی جبکہ کئی افراد زخمی ہو گئے تھے۔ دراصل کانوڑ یاترا کے بعد راستہ کھلنے سے کثیر تعداد میں عقیدت مند درشن کے لیے پہنچے تھے اور بھیڑ کی وجہ سے افرا تفری مچ گئی۔