A última obra que Jorge Canda impulsou como alcalde, no entorno da Alameda do municipio, foi a escollida polo pobo da Lama para homenaxear o seu histórico rexedor. Unha placa sobre un monolito de pedra identifica desde este domingo este vial como Rúa Alcalde Jorge Canda. Foi inaugurada nun emotivo acto no que participaron, ademais de familiares e amigos do ex alcalde, falecido en setembro de 2024, numerosas autoridades. Entre eles estivo o presidente da Deputación, Luis López, que destacou que a reforma executada nesta rúa foi unha actuación "transformadora, moderna e que supón un antes e un despois" no impulso dun novo modelo urbano para este concello. Esta obra, financiada integramente polo goberno provincial con 337.000 euros, transformou esta contorna da Lama nun espazo máis funcional, seguro e adaptado ás necesidades da cidadanía, humanizando a área ao reducir a presenza do tráfico rodado e dar prioridade ao peonil. Inauguración na Lama da Rúa Alcalde Jorge CandaDeputación de Pontevedra En liñas xerais, creouse unha plataforma única que integra a rúa e a praza, ampliáronse as beirarrúas, renováronse os pavimentos, incorporouse novo arborado e mobiliario urbano e dotouse á zona dun sistema de alumeado LED máis eficiente. Tamén se renovaron as infraestruturas subterráneas, incluíndo redes de saneamento, abastecemento e telecomunicacións. "É un lugar, tal e como quería Jorge Canda, para as persoas, para gozar do espazo público e para promover o encontro e a convivencia das veciñas e veciños da Lama", remarcou Luis López. Diante do monolito, antes de que rematara o acto, depositouse un ramo de flores en memoria de Jorge Canda e a Banda de Música da Lama interpretou mentres tanto o himno de Galicia. Inauguración na Lama da Rúa Alcalde Jorge CandaDeputación de Pontevedra