గాలిలో వేలాడే నగరం నిర్మిస్తారని మీరు ఎప్పుడైనా ఊహించారా. మనిషి అనుకుంటే సాధించలేనిది ఏదీ లేదని.. ఇప్పటివరకు ఎన్నోసార్లు అది రుజువు అయింది. టెక్నాలజీని సాయంతో నిర్మాణ రంగం రోజురోజుకూ కొత్త పుంతలు తొక్కుతోంది. ఆకాశాన్ని తాకే పెద్ద పెద్ద భవనాలను అలవోకగా కట్టేస్తున్నారు. ఎత్తైన కొండల్లో అద్భుతమైన బ్రిడ్జిలను నిర్మిస్తున్నారు. సముద్రంలో భారీ నిర్మాణాలను కూడా చేస్తున్నారు. ఇప్పటివరకు ఏ బిల్డింగ్, టవర్ నిర్మించినా.. దానికి పునాది భూమి నుంచే మొదలయ్యేది. ఎంత పెద్ద బిల్డింగ్ అయినా.. భూమిలో పునాది లేకుండా నిర్మించడం కష్టం. కానీ ఇప్పుడు భూమితో సంబంధం లేకుండానే.. గాల్లోనే ఒక నగరం లాంటి పెద్ద భవనం నిర్మాణానికి అడుగులు పడుతున్నాయి. ఏకంగా అంతరిక్షం నుంచే ఏర్పాటు చేసిన కేబుల్స్ సాయంతో ఆ భవనం గాలిలో వేలాడనుంది. ఇప్పటికే అంతరిక్షంలో మనుషులు నివసించేందుకు ప్రయోగాలు జరుగుతున్నాయి. అదే సమయంలో అంతరిక్షం, భూమిని కలుపుతూ.. ఈ భవనాన్ని నిర్మాణం చేయడం విశేషం. అసలేంటీ ఆకాశ భవనం?అమెరికాలోని న్యూయార్క్‌కు చెందిన క్లౌడ్స్ ఆర్కిటెక్చర్ ఆఫీస్ అనే ఒక ఆర్కిటెక్చరల్ సంస్థ.. సరికొత్త ఆలోచనతో యావత్ ప్రపంచం దృష్టిని ఆకర్షించింది. అంతరిక్షంలో ఉండే ఒక గ్రహశకలం (ఆస్టరాయిడ్) నుంచి కిందికి వేలాడదీసినట్లు ఉండే ఒక స్కైస్క్రాపర్ నిర్మాణానికి సంబంధించిన నమూనాను ప్రతిపాదించింది. అంతేకాకుండా దానికి అని పేరు కూడా పెట్టింది.అనలెమ్మ టవర్ నిర్మాణం ఎలా?క్లౌడ్స్ ఆర్కిటెక్చర్ ఆఫీస్ వెల్లడించిన వినూత్న డిజైన్ ప్రకారం.. ఈ టవర్‌‌ను భూమికి 50 వేల కిలోమీటర్ల ఎత్తులో ఉన్న కక్ష్యలోని ఒక ఆస్టరాయిడ్ నుంచి అత్యంత దృఢమైన కేబుల్స్‌ సాయంతో వేలాడదీస్తారు. ఆ ఆస్టరాయిడ్‌ భూమి చుట్టూ ఉన్న కక్ష్యలో తిరుగుతూ ఉంటుంది. సాధారణంగా భవనాలకు భూమిపై పునాది ఉంటే.. వాటన్నింటికంటే కొత్తగా ఈ అనలెమ్మ టవర్‌ పునాదులు అంతరిక్షంలో ఉంటాయన్నమాట. ఇలాంటి నిర్మాణాలను యూనివర్సల్ ఆర్బిటల్ సపోర్ట్ సిస్టమ్ (యూఓఎస్ఎస్) అని పిలుస్తున్నారు. ఇది స్పేస్ ఎలివేటర్ సిద్ధాంతంపై ఆధారపడి ఉంటుందని ఆ సంస్థ చెబుతోంది. అనలెమ్మ టవర్ ఎలా పనిచేస్తుంది?ఈ అనలెమ్మ టవర్ భూమిపై స్థిరంగా ఉండకుండా.. ప్రతీ క్షణం అంతరిక్షం నుంచి భూమిపైకి వేలాడుతూ ఉంటుంది. ఆ ఆస్టరాయిడ్ కక్ష్యలో ప్రయాణం చేస్తున్నపుడు.. ఆ టవర్ కూడా భూమిపై ఒక కదులుతూ ఉంటుంది. ఈ ఆస్టరాయిడ్ భూమి చుట్టూ నిత్యం ఒక 8 ఆకారంలో తిరుగుతుంది. ఈ మార్గాన్ని అనలెమ్మ అంటారు. ఇలా ఆ టవర్ 24 గంటల్లో భూమిపై న్యూయార్క్, , పనామా వంటి నగరాల మీదుగా ప్రయాణిస్తూ ఉంటుంది. ఈ అనలెమ్మ టవర్.. 8 ఆకారంలో తిరిగే మార్గంలో అత్యంత నెమ్మదిగా ప్రయాణించే ప్రదేశాలు న్యూయార్క్ నగరంతో పాటు ఉత్తర, దక్షిణ అర్ధగోళాల మధ్య ఉంటాయని చెబుతున్నారు. అలా నెమ్మదిగా కదిలే సమయంలో.. ఆ భవనంలో ఉన్నవారు భూమిపై ఉన్న ప్రాంతాలతో అనుసంధానం కావడానికి అవకాశం ఉంటుందని పేర్కొంటున్నారు. ఈ ప్రయాణంలో ఆ టవర్‌లో ఉన్నవారికి భూమిపైన ఉన్న ప్రాంతాలు అద్భుతంగా కనిపిస్తాయి. అనలెమ్మ టవర్ నిర్మాణం ఎక్కడ?ఈ అనలెమ్మ టవర్‌ను దుబాయ్‌లో నిర్మించాలని క్లౌడ్స్ ఆర్కిటెక్చర్ ఆఫీస్ సంస్థ ప్రతిపాదించింది. ఇప్పటికే ఆకాశాన్నంటే ఎత్తైన భవనాలను నిర్మించడంలో దుబాయ్ ఆరితేరింది. అంతేకాకుండా.. న్యూయార్క్‌లో నిర్మించడానికి ఖర్చు ఎక్కువవుతుందని ఆ సంస్థ భావిస్తోంది. దుబాయ్‌తో పోలిస్తే న్యూయార్క్‌లో నిర్మాణ ఖర్చు 5 రెట్లు ఉంటుందని పేర్కొంది. ఇక ఈ అనలెమ్మ టవర్ అంతరిక్షంలో తేలియాడే బిల్డింగ్ కావడంతో.. ఎక్కడైనా నిర్మించి.. దాన్ని ఎక్కడికి కావాలంటే అక్కడికి తరలించవచ్చని ఆ సంస్థ వెల్లడించింది. అనలెమ్మ టవర్ ప్రత్యేకతలుఒక నగరం, ఒక స్పేస్ క్రాఫ్ట్‌ను కలిపితే ఎలా ఉంటుందో.. ఈ అనలెమ్మ టవర్ కూడా అలాగే ఉంటుంది. ఈ టవర్ కింది ఫ్లోర్లలో ఇళ్లు, ఆఫీసులు, షాపింగ్ కాంప్లెక్స్‌లు ఉంటాయి. పై అంతస్తుల్లో రీసెర్చ్, టూరిజం, ఆధ్యాత్మిక కేంద్రాల కోసం ఉపయోగించుకోవచ్చు. ఈ అనలెమ్మ టవర్‌కు అవసరమైన కరెంటు సరఫరా అంతరిక్షంలోని సోలార్ ప్యానెల్స్ ద్వారా అందించనున్నారు. భూ వాతావరణం పైన ఉండే ఈ సోలార్ ప్యానెల్స్‌కు నిరంతరం సూర్యరశ్మి లభించడం వల్ల విద్యుత్‌ సరఫరాలో ఎలాంటి అంతరాయం ఉండదు. ఇక వర్షపు నీరు, మేఘాల నుంచి సేకరించిన నీటితో ఆ టవర్‌లో కావాల్సిన అవసరాలకు వాడుకుంటారు. నీటిని ఫిల్టర్ చేసి, రీసైకిల్ చేసిన తర్వాత వినియోగిస్తారు. ఇక ఈ టవర్‌లో ఉండే లిఫ్ట్‌లకు కేబుల్స్ కాకుండా.. ఎలక్ట్రోమాగ్నెటిక్ ఎలివేటర్లను ఉపయోగించనున్నారు.అనలెమ్మ టవర్ నిర్మాణంలో సవాళ్లుఅంతరిక్షం నుంచి కేబుల్స్ సాయంతో గాలిలో ఇంద్ర భవనం లాంటి నిర్మాణం అనేది ఒక అద్భుతమైన ఆలోచన అయినప్పటికీ.. అది ఆచరణలోకి రావాలంటే ఎన్నో సవాళ్లు ఉన్నాయి. ఆస్టరాయిడ్‌ను కంట్రోల్ చేయడం, దాన్ని ఒక స్థిరమైన కక్ష్యలోకి తీసుకురావడం అనేవి జరగాలంటే.. ఇప్పటివరకు ఉన్న టెక్నాలజీ సరిపోదు. అందుకు మరింత అడ్వాన్స్‌డ్ టెక్నాలజీ కావాలి. అంతేకాకుండా అంతటి భారీ టవర్‌ను అంతరిక్షంలో వేలాడదీసేంత బలమైన కేబుల్స్ సహా ఇతర పరికరాలు అందుబాటులో లేవు. అంతేకాకుండా.. భూమి నుంచి అంత ఎత్తులో ఏర్పాటు చేసే ఆ టవర్‌లో ఉండేవారికి రేడియేషన్, తీవ్రమైన ఉష్ణోగ్రతలు, పీడనం తక్కువగా ఉండటం వంటి వాటిని ఎప్పటికప్పుడు కంట్రోల్‌లో ఉంచడం పెను సవాలుగా మారనుంది.అయితే ప్రస్తుతానికి అనలెమ్మ టవర్ అనేది ఒక సైద్ధాంతిక నమూనా మాత్రమేనని చెప్పారు. స్పేస్ టెక్నాలజీని, భవన నిర్మాణ రంగం కలిసి భవిష్యత్తులో సృష్టించే అద్భుతాలకు తొలిమెట్టుగా మారనుంది. ఇప్పటికిప్పుడు ఈ ప్రాజెక్ట్ ప్రారంభించి.. ఆచరణలోకి తీసుకురావడం అంత చిన్న విషయమేమీ కానప్పటికీ.. భవిష్యత్తులో నిర్మించే అత్యాధునిక నిర్మాణాల గురించి ఆలోచించేలా చేస్తోంది. ప్రపంచవ్యాప్తంగా రోజురోజుకూ పెరుగుతున్న జనాభా.. భూమి కొరత వంటి సమస్యలను ఎదుర్కొవడానికి గాలిలో ఒక నగరాన్ని ఏర్పాటు చేయడం అనేది ముందుచూపుగా భావిస్తున్నారు.